„ჩვენ პასუხი უნდა გავცეთ, როცა პოლიტიკურ ძალებსა და რაღაც ჯგუფებს შორის შეთანხმება ხდება. პრემიერი არ არის ჩართული ამ ყველაფერში, მაგრამ უფრო დაბალ დონეზე ხდება კავშირების ჩამოყალიბება",- ამის შესახებ საკონსტიტუციო სასამართლოს თავმჯდომარესთან შეხვედრის შემდეგ პრეზიდენტმა, გიორგი მარგველაშვილმა განაცხადა.
პრეზიდენტი არჩევნებისა და სახელმწიფო ინსტიტუტების დაცვის მიზნით, პრემიერსა და პარლამენტის თავმჯდომარესთან შეხვედრის მზადყოფნას გამოთქვამს, რათა იმ „საშიშ ტენდენციებს, რომელიც პოლიტიკურ ცხოვრებაში ჩნდება, ადეკვატური პასუხი გაეცეს".
საქართველოს პრეზიდენტის, გიორგი მარგველაშვილის თქმით, დიდი ხანია, ის კორცხელის შემთხვევის ადეკვატურად გამოძიებაზე საუბრობს. პრეზიდენტის შეფასებით, ეს შემთხვევა გარკვეულ პროცესებს ბიძგებს მისცემს, რაც არჩევნების პერიდოში რთულად გასამკლავებელი იქნება.
„კორცხელის შემთხვევა თუ ადეკვატურად არ იქნება პასუხგაცემული, თუ ჩვენს საზოგადოებას არ ვაჩვენებთ იმას, რომ ასეთი ტიპის არჩევნების ჩატარება ჩვენთვის მიუღებელია, ჩვენ ამ თემის გაგრძელებას მივიღებთ”, - აღნიშნა პრეზიდენტმა.
