საქართველოს კინომატოგრაფიის ეროვნული ცენტრის ინფორმაციით, „ოსკარის" უცხოენოვანი ფილმების ნომინაციისთვის წელს რუსუდან გლურჯიძის ფილმი „სხვისი სახლი" შეირჩა.
გადაწყვეტილება 9 აგვისტოს ეროვნული კინოცენტრის სპეციალურად შექმნილმა კომისიამ მიიღო.
კომისიის წევრებმა არჩევანი ოთხ ფილმს შორის გააკეთეს. „სხვისი სახლის" გარდა შესარჩევ პროცესში მონაწილეობდა: ნინო ბასილიას „ანას ცხოვრება", თეონა და ტიერ გრენადეების „ძმა" და ვანო ბურდულის „გაყინული შადრევნების წელიწადი".
„სხვისი სახლი" საქართველოს, რუსეთის, ხორვატიისა და ესპანეთის ერთობლივი ნამუშევარია.
კინომატოგრაფიის ეროვნული ცენტრის ინფორმაციით, ფილმმა წელს კარლოვი ვარის საერთაშორისო კინოფესტივალზე გაიმარჯვა, საკონკურსო პროგრამაში East of the West.