„ჩემი კალენდარი“ პირველი ქართული აპლიკაციაა ქალებისთვის. ის უკვე ხელმისაწვდომია, ქალებს შეუძლიათ ჩამოტვირთონ და უფრო მეტი რამ გაიგონ რეპროდუქციული ჯანმრთელობის  შესახებ.

My Calendar Geo - აპლიკაციის ჩამოტვირთვა შესაძლებელია როგორც Android-ის, ისე iOS ოპერატიულ სისტემებზე მომუშავე სმარტფონებისთვის.

აპლიკაცია ორგანიზაცია „თანადგომამ“ რეპროდუქციული პროგრამის ფარგლებში მოამზადა. როგორც ორგანიზაციის რეპროდუქციული ჯანმრთელობის პროგრამის მენეჯერი ქეთი ჭელიძე ამბობს, აპლიკაცია მიზნად ისახავს მოსახლეობის ინფორმირებას რეპროდუქციულ ჯანმრთელობასა და კონტრაცეფციაზე. აპლიკაციას მოსდევს საინფორმაციო ნაწილი, სადაც ქალებს შეუძლიათ, გაიგონ სხვადასხვა თავდაცვის საშუალების შესახებ, დააკვირდნენ ციკლს და გამოთვალონ, როდის არის ჩასახვისთვის ხელსაყრელი დღეები და როდის არა. აპლიკაციას აქვს შეხსენების ფუნქცია, ის შეახსენებს მომხმარებელს, როდის უნდა მიიღოს კონტრაცეპტივი, როდის მოდის კრიტიკული დღეები და ა.შ.

ქეთი ჭელიძე ამბობს, რომ ეს არის კარგი საშუალება ქალებისთვის, ოჯახი დაგეგმოს ეფექტიანად, აიცილოს არასასურველი ორსულობა და აბორტი. ქალებს ექნებათ საშუალება, მართონ თავიანთი რეპროდუქციული ჯანმრთელობა.