პაატა ბურჭულაძის თქმით, ბლოკიდან "გირჩის" გაყვანის ერთ-ერთი მიზეზი პარტიის დაფინანსების წყაროა. მისი თქმით, "გირჩს" ბიძინა ივანიშვილი აფინანსებს და ის ივანიშვილისგან ფულს ვერ მიიღებს. მისივე თქმით, ამის შესახებ მისთვის დღეს გახდა ცნობილი.

ბლოკის დატოვების შესახებ "გირჩმა" ცოტა ხნის წინ სპეციალური განცხადება გაავრცელა.

"გვინდა, სანამ ეს მნიშვნელოვანი საკითხი პოლიტიკური მანიპულაციების თემა გახდება, ჩვენ მხარდამჭერებსა და გულშემატკივრებს განგიმარტოთ. „გირჩმა“ მიიღო გადაწყვეტილება დატოვოს საარჩევნო ბლოკი „პლატფორმა -პაატა ბურჭულაძე - სახელმწიფო ხალხისთვის“. ეს არის რთული, მაგრამ საჭირო გადაწყვეტილება, რადგან ბლოკს აქვს სერიოზული პრობლემები, როგორც ადამიანური ურთიერთობებისა და მენეჯმენტის, ისე ფინანსური კუთხით. „გირჩი“ არის საკუთარი პრინციპების ერთგული და არსებობს ზღვარი, რომელსაც ჩვენ არასოდეს გადავალთ. სწორედ ამიტომ მივიღეთ ეს გადაწყვეტილება. სამწუხაროდ, „გირჩი“ გამოტოვებს 2016 წლის საპარლამენტო არჩევნებს, მაგრამ ჩვენ დავრჩებით პარტიად, რომელმაც არსებობის ერთი წლის განმავლობაში შექმნა პოლიტიკური დღის წესრიგი საქართველოში. გირჩი რჩება პოლიტიკაში და განაგრძობს ბრძოლას იმ იდეებისა და ფასეულობებისთვის, რომლისაც სჯერა." - ნათქვამია გირჩის განცხადებაში.