დღეს თბილისის საქალაქო სასამართლოში ნაციონალისტური მსვლელობისას დაკავებული 12 პირის სასამართლო პროცესი გაიმართა. პროცესი დახურული იყო. 12 დაკავებულიდან 7 არასრულწოვანია. მოსამართლემ აღკვეთის ღონისძიებაზე იმსჯელა. პროკურატურა თორმეტივე დაკავებულისთვის პატიმრობას ითხოვდა. 

5 სრულწლოვან დაკავებულს მოსამართლემ გირაო შეუფარდა, ისინი გირაოს გადახდის შემდეგ გათავისუფლდებიან. შვიდი არასრუწლოვანი კი მშობელთა მეთვალყურეობის ზედამხედველობის პირობით დარბაზიდან გათავისუფლდნენ. 

დაკავებულებს ხულიგნობასთან ერთად რასობრივი დისკრიმინაციის ბრალდებაც აქვთ წაყენებული, რაც 4-დან 7 წლამდე პატიმრობას ითვალისწინებს.

ადვოკატ გელა ნიკოლეიშვილის განცხადებით, რომელიც ორგანიზაცია „ქართული ძალის" წევრის, ნიკოლოზ ბურნაძის ინტერესებს იცავს, საქმის მასალებიდან გამომდინარე არანაირი მტკიცებულება, რომ  მისი დაცვის ქვეშ მყოფმა ჩაიდინა კონკრეტული დანაშაული, რომელიც გამოხატვისა და სიტყვის თავისუფლების ფარგლებში არ ჯდება, რეალურად არ არსებობს. 

ადვოკატის ცნობით, მოსამართლემ დაკავებულებს ჰკითხა, დაკავებისას ხომ არ დაირღვა მათი უფლებები და არაჰუმანურ მოპყრობას ხომ არ ჰქონდა ადგილი. "რამდენიმემ უთხრა, რომ ვიღაცამ კონდახი ჩაარტყა; რამდენიმემ თქვა, რომ 10 საათი ტუალეტში არ გაუშვეს. დანარჩენებმა - დაკავებისას არაფერი არ ყოფილაო", - განუცხადა ჟურნალისტებს ადვოკატმა. 

28 სექტემბერს ნაციონალისტური ორგანიზაცია „ქართული ძალის" მსვლელობა აღმაშენებლის გამზირზე, შეხლა-შემოხლით და მსვლელობის მონაწილეთა დაკავებით დასრულდა.