ახალი პოლიტიკური ცენტრის „გირჩის“ ერთ-ერთი დამფუძნებელი ზურა ჯაფარიძე ფიქრობს, რომ არჩევნებამდე რამდენიმე დღით ადრე ქალაქის ცენტრში დეპუტატის აფეთქება რუსეთს აძლევს ხელს და მიაჩნია, რომ მომხდარზე სრული პასუხისმგებლობა ხელისუფლება ეკისრება.

„ვერსიები შეიძლება მილიონაირი არსებობდეს. უკვე დაწყებულია სხვადასხვა პოლიტიკური ძალების მხრიდან ერთმანეთზე გადაბრალება - გადმობრალება. ნებისმიერ შემთხვევაში არჩევნებამდე რამდენიმე დღით ადრე თბილისის ცენტრში დეპუტატის აფეთქება საკუთარ მანქანაში ეს ცალსახად არის ის რაც აწყობს ამ ქვეყნის მტერს, ამ შემთხვევაში რუსეთს. რა ვერსიაც არ უნდა არსებობდეს ეს აძლევს მხოლოდ და მხოლოდ ხელს რუსეთს. რა ვერსიაც არ უნდა იყოს საბოლოო ჯამში, სრული პასუხისმგებლობა არის ხელისუფლებაზე. ჩვენ გვყავს სახელმწიფო უსაფრთხოების სამსახური, რომელიც წელიწადში 100 მილიონი გვიჯდება და რას აკეთებს ეს სამსახური კაცმა არ იცის გარდა იმისა, რომ ვიცით რომ გვისმენენ. ფულს ვხარჯავთ არაფერში, მაშინ როცა არჩევნებამდე რამდენიმე დღით ადრე დეპუტატს აფეთქებენ ქალაქის ცენტრში. ამაზე საშინელება რა უნდა მოხდეს არ ვიცი.“- განუცხადა „ლიბერალს“ ზურა ჯაფარიძემ.

გუშინ საღამოს დეპუტატ თარგამაძის მანქანა აფეთდა კოლმეურნეობის მოედანზე. თარგამაძე დაშავებული არაა. დაშავდნენ ადგილობრივი გამვლელები. შსს გამოძიება დამამძიმებელ გარემოებებში განზრახ მკვლელობის მუხლით დაიწყო.