შსს-ს მინისტრი მიმართავს ყველა მსხვერპლს, არ გაჩუმდნენ ოჯახში ძალადობაზე - "ნუ შეშინდებით, მთელი ჩვენი უწყება, 40 000 ადამიანი თქვენს გვერდით ვართ, იმისთვის რომ დაგიცვათ", - ამის შესახებ გიორგი მღებრიშვილმა სამინისტროში ოჯახში ძალადობის წინააღმდეგ სოციალური კამპანია ”ძალა ნდობას” პრეზენტაციაზე განაცხადა.
მღებრიშვილის განცხადებით, სამინისტროსთვის ოჯახში ძალადობის წინააღმდეგ ბრძოლა კვლავ რჩება ერთ-ერთ უმნიშვნელოვანეს პრიორიტეტად.
”აქვე უნდა გავითვალისწინოთ, რომ ამ ძალზე მგრძნობიარე პრობლემის დასაძლევად, იმისთვის რომ პოლიციელებმა შეძლონ მასზე დაკისრებული უფლება-მოვალეობის შესრულება, აუცილებელია, თავად ძალადობის მსხვერპლთა და მოწმეების თანადგომა, მხარდაჭერა და თანამშრომლობა”, - აღნიშნა მინისტრმა.
კამპანია ”ძალა ნდობას” ევროკავშირის მიერ დაფინანსებული პროექტის ”საქართველოს შს სამინისტროს ხელშეწყობა ოჯახში ძალადობის წინააღმდეგ ბრძოლაში” ფარგლებში ხორციელდება. კამპანიის მიზანია ოჯახში ძალადობის პრევენციის ხელშეწყობა და აღნიშნული დანაშაულის წინააღმდეგ ქვეყანაში მოქმედი სამართლებრივი მექანიზმების სახელმწიფო თუ სხვა არსებული სერვისების შესახებ მოსახლეობის ცნობიერების ამაღლება.
კამპანიის ღონისძიებაზე აღინიშნა, რომ ერთი მხრივ, ცნობიერების ამაღლებამ და მეორე მხრივ, შსს-ს თანამშრომელთა სათანადო მომზადებამ განაპირობა ის შედეგი, რომ გამოცემული შემაკავებელი ორდერების და ოჯახში ძალადობის ფაქტებზე დაწყებული გამოძიების მაჩვენებლები უპრეცედენტოდ გაზრდილია.
შს მინისტრმა გიორგი მღებრიშვილმა ოჯახში ძალადობის წინააღმდეგ შეტანილი წვლილისთვის სამინისტროს სხვადასხვა დანაყოფის ხუთი თანამშრომელი მადლობის სიგელებით დააჯილდოვა. სპეციალური ჟიურის მიერ ასევე გამოვლინდა კონკურსის ”საგაზეთო სტატია ოჯახში ძალადობის შესახებ” სამი გამარჯვებული, რომლებსაც სხვადასხვა პრიზი გადაეცათ.
