თბილისის მერიის ზედამხედველობის საქალაქო სამსახურმა „სვანიძის ქუჩის დაზარალებულთა კომიტეტის“ თავმჯდომარე თამაზ ელიზბარაშვილი 10 000 ლარით დააჯარიმა,- ამ ინფორმაციას „სვანიძის ქუჩის დაზარალებულთა კომიტეტი“ ავრცელებს.

კომიტეტის წევრთა განცხდების თანახმად, საქმე ეხება სვანიძის ქუჩის ბოლოს, მდინარე ვერეს ნაპირზე დამონტაჟებულ მოაჯირს, რომელიც, მერიის მტკიცებით, თამაზ ელიზბარაშვილმა აუცილებელი სანებართვო დოკუმენტაციის გარეშე გააკეთა. ამ ადგილზე ჯებირი წლების განმავლობაში არებობდა, მაგრამ  13-14 ივნისის სტიქიამ ის მთლიანად გაანადგურა.

„თამაზ ელიზბარაშვილი, რომლის საცხოვრებელი სახლი სვანიძის ქუჩაზე მდებარეობს, თბილისის მერიას კარგა ხანს ოფიციალურად და საჯაროდ სთხოვდა 13-14 ივნისის სტიქიისგან ყველაზე მეტად დაზიანებულ სვანიძის ქუჩაზე, მდინარე ვერეს ნაპირზე მოაჯირი გაეკეთებინა და ამით ადამიანთა სიცოცხლე დაეცვა. თბილისის მერიამ თამაზ ელიზბარაშვილისა და დედაქალაქის მცხოვრებთა თხოვნა არაფრად ჩააგდო. არადა, თითოეული გამვლელი დგებოდა სასიცოცხლო საფრთხის ქვეშ. ასეთი ფაქტი დაფიქსირდა კიდეც - ერთი ადამიანი მდინარეში ჩავარდა და სიკვდილს ძლივს გადაურჩა - სხვა ადამიანების დახმარების გარეშე გარდაუვალი იქნებოდა ფატალური შედეგი“,- აღნიშნულია კომიტეტის განცხადებაში.

კომიტეტის წევრთა ინფორმაციით, თამაზ ელიზაბრაშვილმა თავისი ხარჯით ჯებირი სწორედ ამ შემთხვევის შემდეგ აღადგინა და ბეტონის ბილიკი მოაწყო. ისინი განმარტავენ, რომ ელიზბარაშვილს ღობე  თვითნებურად ან პირადი ინტერესის გამო არ აღუდგენია. მათი თქმით, აღნიშნული პრობლემების მოგვარება სახელმწიფოს ვალდებულებაა და თამაზ ელიზბარაშვილის არაერთი მცდელობის მიუხედავად, მერიისგან არანაირი რეაგირება არ მოჰყოლია.

თბილისის მერიის ზედამხედველობის სამსახური ელიზბარაშვილს, ჯარიმის გადახდასთან ერთად, ჯებირის ნებაყოფლობით დემონტაჟსაც ავალდებულებს.

„თამაზ ელიზბარაშვილმა მოაჯირი მდინარის მხოლოდ ერთ ნაპირზე აღადგინა. მეორე მხარს კი ისევ არსებობს საფრთხე, რომ იქ ვინმე ჩავარდეს და ფატალური შედეგი მივიღოთ. ახლა კი, იმის ნაცვლად, რომ ადამიანების სიცოცხლე დაიცვან და მეორე მხარეს თვითონვე გააკეთონ დროებითი მოაჯირი მაინც, თამაზ ელიზბარაშვილს სთხოვენ, ადამიანების სიცოცხლე მანაც არაფრად ჩააგდოს“,- ვკითხულობთ განცხადებაში.

თამაზ ელიზბარაშვილი მერიას მოუწოდებს, მის მიერ აშენებული ჯებირის დემონტაჟის ნაცვლად მერიის წარმომადგენლებმა მსგავსი ჯებირი მეორე მხრესაც ააშენონ. ის ზედამხედველობის საქალაქო სამსახურის გადაწყვეტილების გასაჩივრებას მერიაში აპირებს და დავით ნარმანიას მოუწოდებს, „ამ უსამართლობას მხარი არ დაუჭიროს და აღნიშნული ჯარიმა გააუქმოს“. წინააღმდეგ შემთხვევაში, ელიზბარაშვილი გეგმავს, მერიას  სასამართლოში უჩივლოს.

„მათი გასაკეთებელი საქმე მე გავაკეთე და ამ დროს მოდის და მადლობის მაგივრად, მაჯარიმებს! ვინაიდან კანონმორჩილი ადამიანი გახლავართ და მერიის ზედამხედველობის სამსახურის მიერ გამოტანილი დადგენილების გასაჩივრება ისევ თბილისის მერიაში შემიძლია, ასეც მოვიქცევი. იმედს ვიტოვებ, თბილისის მერი დავით ნარმანია ამ უსამართლობას ხელს არ მოაწერს“,- ამბობს თამაზ ელიზბარაშვილი.

მერიის ზედამხედველობის საქალაქო სამსახურში კი აცხადებენ, რომ თამაზ ელიზბარაშვილმა სახელმწიფო ტერიტორიაზე მოაჯირი შესაბამისი სანებართვო დოუმენტაციის გარეშე ააგო. სამსახურის ინფორმაციით, ელიზბარაშვილს შესაბამისი დოკუმენტაციის წარმოდგენა დაევალა, რაც არ გაუკეთებია.

„ზედამხედველობის სამსახურის მიერ მოხდა ფაქტის შემოწმება და ელიზბარაშვილს დაევალა შესაბამისი სანებართვო დოკუმენტაციის წარმოდგენა. მოთხოვნათა შეუსრულებლობის გამო თამაზ ელიზბარაშვილი საქართველოს კანონის „პროდუქტის უსაფრთხოებისა და თავისუფალი მიმოქცევის კოდექსის“ 44-ე მუხლის 1-ლი ნაწილის „ა“ პუნქტით გათვალისწინებული სამშენებლო სამართალდარღვევისთვის დაჯარიმდა 10.000 ლარით“,- აცხადებენ მერიის ზედამხედველობის საქალაქო სამსახურში.