უკვე მეორე წელია, გურჯაანში, „ხელი ხელს" საოჯახო ტიპის სახლის მცხოვრებლები წინასაახალწლოდ ჩურჩხელებს ამზადებენ და საცალო და კორპორატიულ შეკვეთებს იღებენ. თავიანთი ბადაგით დამზადებულ ჩურჩხელებს კი წელს პირველად გაყიდიან. 

„გადასარევი ჩურჩხელები“ - ასე ჰქვია „ხელი ხელს" სახლებში მცხოვრები შეზღუდული შესაძლებლობის მქონე ადამიანების მიერ დამზადებულ ჩურჩხელებს. 

„ჩურჩხელების შეძენა საოჯახო ტიპის მომსახურების მხარდაჭერაცაა. ესაა სოციალური აქტივობა, რომელიც ადამიანების თანასწორ შესაძლებლობებზე აკეთებს აქცენტს და დეინსტიტუციონალიზაციის მნიშვნელობას უსვამს ხაზს", - ამბობს „ხელი ხელს" ორგანიზაციის კომუნიკაციის მენეჯერი, გიორგი ლიპარიშვილი. 

სოციალური ინკლუზიის მხარდამჭერი არასამთავრობო ორგანიზაცია „ხელი ხელს“ 2011 წლიდან მუშაობს შეზღუდული შესაძლებლობის მქონე პირებთან. ორგანიზაცია მიზნად ისახავს შეზღუდული შესაძლებლობის მქონე პირთა მხარდაჭერას საოჯახო საცხოვრისის სერვისით, მათ გაძლიერებას და დამოუკიდებლობის ხელშეწყობას. ორგანიზაციას გურჯაანში ორი საოჯახო ტიპის საცხოვრისი აქვს, 2015 წელს კი თბილისშიც გაიხსნა.

გოჩა „ხელი ხელს" საოჯახო ტიპის პირველი სახლის მამასახლისია. სახლის საქმეებს დიდი გულისყურით მეთვალყურეობს. რთველშიც მონაწილეობს და სხვებს ჩურჩხელების „გაფენაშიც" ეხმარება.