„თეთრი ხმაურის მოძრაობის“ განცხადებით, კიდევ ერთი მათი მხარდამჭერი დააკავეს. ორგანიზაციის წარმომადგენლის, პაატა საბელაშვილის განცხადებით, მოძრაობის მხარდამჭერი, სავარაუდოდ, ნარკოტიკული ნივთიერებების შეძენა-შენახვის ბრალდებით დააკავეს. მისი თქმით, დაკავებულს სახლში მცირე რაოდენობით მარიხუანა აღმოუჩინეს.
„პოლიციამ იცრუა „გაზიდან ვართო“ და ასე მოტყუებით შეაღწია სახლში ყოველგვარი ორდერის გარეშე. ამის უფლებას პოლიციას აძლევს ჩვენი უსამართლო, დანაშულეობრივი კანონმდებლობა, კერძოდ, ოპერატიული ინფორმაციის შემთხვევაში. მას არ სჭირდება მოსამართლისთვის იმის დადასტურება, რომ საკმარისი საფუძველი აქვს, შეიჭრას მოქალაქის პირად სივრცეში და თავდაყირა დააყენოს მისი სახლი“, - ამბობს პაატა საბელაშვილი
საბელაშვილის ინფორმაციით, დაკავებულმა უარი თქვა ბიოლოგიური მასალის ჩაბარებასა და კლინიკურ დათვალიერებაზე.
„ადვოკატმა უკვე ნახა დაკავებული. მოვახერხეთ ის, რომ პოლიციას მოვუგეთ ამ ფრონტზეც, მინიმალური დანაკარგით“, - ამბობს საბელაშვილი
„თეთრი ხმაურის მოძრაობის“ მხარდამჭერი ამ დრომდე დაკავებულია.
მოძრაობა დაკავებულის სახლში, ჩხრეკის შემდგომ გადაღებულ ფოტოსაც ავრცელებს: „ფოტოზე ასახულია ის, რასაც ჩხრეკის გადაუდებელი აუცილებლობა არ მოითხოვდა“