1870 წლის დოკუმენტის მიხედვით, რომელიც წარმოადგენს „ტიფლისის გუბერნიის" აღწერას, სოფელ მოხეში ფიქსირდება ერთი მეჩეთი.

„ლიბერალის" მიერ მოპოვებული დოკუმენტი, - კრებული  - თბილისის გუბერნიის აღწერილობა, გამოცემულია თბილისის გუბერნატორის კანცელარიის მიერ ა. ლ. ზისერმანის რედაქციით. თბილისი 1870 წ.. 

 შეგახსენებთ, რომ 2016 წლის 1 დეკემბერს „მოხის კომისიის"  სხდომა გაიმართა. კომისიამ რამდენიმე გადაწყვეტილება მიიღო, რომელთაგან ერთ-ერთი ე.წ. სადავო შენობას შეეხება. მოხის შენობას კულტურული მემკვიდრეობის ძეგლის სტატუსი მიენიჭება. რაც ნიშნავს იმას, რომ შენობა ძეგლთა დაცვის სააგენტოს ბალანსზე გადავა, მას მუსლიმები რელიგიური დანიშნულებით ვერ გამოიყენებენ. 

ადგილობრივი მუსლიმებისთვის კომისიის გადაწყვეტილება მიუღებელია. 

სამცხე-ჯავახეთის მუფთის, მამუკა ვაშაყმაძის თქმით, სოფელ მოხეში სადავო შენობის ადგილას, უნდა ყოფილიყო ხის მეჩეთი. დაზუსტებით არ შეგვიძლია თქმა, დოკუმენტში მოხსენიებული მეჩეთი იდგა  თუ არა  სადავო შენობის ადგილას, თუმცა არსებობდა ტენდენცია, რომ თითო სოფელში არსებობდა თითო მეჩეთი.

ორ თემს შორის დაპირისპირება 2014 წლის ოქტომბერში დაიწყო, როდესაც ადგილობრივი ქრისტიანები და მუსლიმები სადავო ნაგებობის წარმომავლობაზე ვერ შეთანხმდნენ.