„საყოველთაო ჯანდაცვის პრინციპი შენარჩუნდება. ყველა მოქალაქე იქნება დაზღვეული, უბრალოდ შეიცვლება პრინციპები და შედარებით შეძლებული მოქალაქეები უფრო მეტს გაიღებენ საკუთარი ჯიბიდან, რათა შეიძინონ კერძო დაზღვევა“,- ამის შესახებ პარლამენტის ჯანდაცვისა და სოციალური დაცვის კომიტეტის თავმჯდომარემ, აკაკი ზოიძემ ბიუჯეტის პროექტზე საუბრისას განაცხადა. 

მისი ინფორმაციით, პროგრამის ოპტიმიზაცია მოხდება. საუბარია შერჩევით კონტრაქტირებაზე, დაფინანსების მეთოდის ცვლილებასა და ა.შ.

„ეს არის ის, რომ საყოველთაო დაზღვევა ხარჯეფექტიანი გახდეს და ამის ხარჯზე ჩვენ ყველაზე ღარიბ მოქალაქეებს გავუზრდით მომსახურეობის პაკეტს, რომელშიც შევა მედიკამენტები და მათი დაფინანსება“,- განაცხადა ზოიძემ. 

რაც შეეხება პენსიებს, ზოიძის თქმით, „ქართული ოცნების“ პროგრამაში პენსიებთან დაკავშირებული პრინციპული საკითხი ძალიან ნათლად იყო გაწერილი.

„პროგრმაში გარკვევით ეწერა, რომ პენსიები გაიზარდა 2016 წელს, ასევე 2017 წელს და ეს გაზრდილი პენსია იქნებოდა ჩადებული 2017 წლის ბიუჯეტში, ხოლო 2018 წლის ბიუჯეტში დაიწყება პენსიების ინდექსირება ეკონომიკური ზრდის და ინფლაციის მიხედვით“, - განაცხადა აკაკი ზოიძემ.