სიღნაღის მუნიციპალიტეტის სოფელ ნუკრიანში კულტურის სახლი დაიწვა. ამ ინფორმაციას „რუსთავი 2“ ავრცელებს. ადგილობრივების ინფორმაციით, კულტურის სახლის შენობაში იუსტიციის სამინისტროს საზოგადოებრივი ცენტრი, ბიბლიოთეკა და რამდენიმე ოფისი იყო განთავსებული. 

საგანგებო სიტუაციების მართვის სააგენტოს ინფორმაციით, ხანძარი 600 კვ.მ-მდე ფართზე გაჩნდა. დაიწვა კულტურის სახლის დარბაზი და სახურავი. ცეცხლის ლოკალიზება რამდენიმე საათის განმავლობაში მიმდინარეობდა.

როგორც ტელეკომპანიასთან საუბრისას სოციალური საწარმო „ნუკრიანის“ დირექტორი მაია ბიძინაშვილი ვარაუდობს, შესაძლოა, ხანძრის მიზეზი ბავშვების მიერ დანთებული ცეცხლი იყო. მისი ინფორმაციით, ხანძარმა სოციალურ საწარმოს მნიშვნელოვანი ზიანი მიაყენა. ბიძინაშვილის თქმით, საწარმო იქ მომუშავე ქალებისთვის შემოსავლის წყაროა იყო და ახლა „ღია ცის ქვეშ დარჩნენ“. 

ხანძრის გაჩენის ერთ-ერთ მიზეზად ძველი ელექტროგაყვანილობაც სახელდება.