რუსეთის საგარეო საქმეთა სამინისტრო თურქეთში რუსეთის ელჩის, ანდრეი კარლოვის მკვლელობას ტერაქტის კვალიფიკაციას ანიჭებს. მომხდარი ფაქტი ორშაბათს გაეროს უშიშროების საბჭოს სხდომაზე დაისმება. ამის შესახებ რუსეთის საგარეო უწყების ოფიციალურმა წარმომადგენელმა მარია ზახაროვამ განაცხადა.

როგორც მან აღნიშნა, თურქეთის ხელისუფლებამ რუსი დიპლომატის მკვლელობა გულდასმით უნდა გამოიძიოს. „ტერორიზმი ვერ გაიმარჯვებს. ჩვენ მის წინააღმდეგ მტკიცედ ვიბრძოლებთ“, - განაცხადა ზახაროვამ.

ამერიკის სახელმწიფო დეპარტამენტი გმობს თურქეთში რუსეთის ელჩზე ანკარაში განხორციელებულ თავდასხმას, რასაც რუსი დიპლომატი ემსხვერპლა. ამის შესახებ „რია ნოვოსტის“ სახელმწიფო დეპარტამენტის ოფიციალურმა წარმომადგენელმა ჯონ ქირბიმ განუცხადა.

ადამიანი, რომელმაც თურქეთში რუსეთის ელჩს, ანდრე კარლოვს ესროლა, ანკარაში პოლიციაში მუშაობდა. ამის შესახებ კი „როიტერი“ იუწყება. 

თურქეთში რუსეთის ელჩი, ანდრეი კარლოვი, რომელსაც დღეს, 19 დეკემბერს საღამოს უცნობმა პირმა ესროლა, მიყენებული ჭრილობებისგან გარდაიცვალა. რუს დიპლომატს მაშინ ესროლეს, როდესაც ის თანამედროვე ხელოვნების გალერეაში ფოტოგამოფენაზე გამოდიოდა.