მაია რჩეულიშვილის ადვოკატები სარჩელით ადამიანის უფლებათა ევროპულ სასამართლოს მიმართავენ. ამის შესახებ რჩეულიშვილის ადვოკატმა მარიამ ცუცქირიძემ ჟურნალისტებს დღევანდელი სასამართლო პროცესის დასრულების შემდეგ განუცხადა.
როგორც ცუცქირიძემ აღნიშნა, დაცვის მხარის ხელთ არსებული ყველა მასალა სტრასბურგში უახლოეს დღეებში გაიგზავნება.
„მასალები სრულად გაიგზავნება ამ კვირაში სტრასბურგში, როგორც ზოგადად აღკვეთის ღონისძიებასთან დაკავშირებით, ასევე ჯანმრთელობის მდგომარეობასთან დაკავშირებითაც. სავარაუდოდ 23 დეკემბერს გავგზავნით. 24 საათის განმავლობაში განიხილავს სტრასბურგი ჯანმრთელობასთან დაკავშირებულ საკითხებს. სტრასბურგის იმედი მაინც გვაქვს”, - განაცხადა ცუცქირიძემ.
რაც შეეხება მაია რჩეულიშვილის პატიმრობაში დატოვებასთან დაკავშირებით მოსამართლის დღევანდელ გადაწყვეტილებას, ადვოკატის თქმით, სასამართლო სუბიექტური იყო.
„მაია რჩეულიშვილი ძალიან დასუსტებულია და ბიოფსიის გაკეთება არ შეიძლება, იმიტომ რომ ეს მის ჯანმრთელობის მდგომარეობას უფრო მეტად დაამძიმებს. ექიმები ელოდებიან, რომ ცოტა მომჯობინდეს და ამის შემდეგ გაკეთდება ეს ანალიზი. მე ვიგრძენი, რომ სასამართლო იყო სუბიექტური. როგორც კი ჩატარდება დამატებითი გამოკვლევა და გვექნება ახალი გარემოება, ჩვენ აუცილებლად ისევ მივმართავთ სასამართლოს აღკვეთის ღონისძიების შეცვლის შუამდგომლობით”, - აღნიშნა ადვოკატმა.
სასამართლომ „ცენტრ პოინტის“ დამფუძნებელი მაია რჩეულიშვილი წინასწარ პატიმრობაში დატოვა. მოსამართლემ არ დააკმაყოფილა ბრალდებულის ადვოკატების შუამდგომლობა აღკვეთის ღონოსძიების სახით შეფარდებული პატიმრობის გირაოთი შეცვლასთან დაკავშირებით.
მაია რჩეულიშვილის ადვოკატი მისი დაცვის ქვეშ მყოფის გათავისუფლებას ჯანმრთელობის მდგომარეობის გაუარესების გამო, მოითხოვდა.
