ერთ- ერთ სააღმზრდელო დაწესებულებაში ბავშვებს შორის, სავარაუდოდ, სექსუალური ძალადობის შემთხვევა დაფიქსირდა - ამის შესახებ განცხადებას სოციალური მომსახურების სააგენტო ავრცელებს. განცხადებაში წერია, რომ ეჭვის გაჩენისთანავე, სააგენტომ ფაქტის მოკვლევა დაიწყო და ამის შესახებ შინაგან საქმეთა სამინისტროს აცნობა, რომელმაც შესაძლო სექსუალური ძალადობის ფაქტების გამოსავლენად გამოძიება უკვე დაიწყო.
სააგენტოს ინფორმაციით, აღნიშნულ სააღმზრდელო დაწესებულებაში სახელმწიფო მზრუნველობაში მყოფი 9 ბავშვი ცხოვრობს, რომლებთანაც მუშაობს სოციალური მუშაკი და ფსიქოლოგი. სავარაუდო მოძალადე უკვე გაყვანილია დაწესებულებიდან.
საქართველოს შრომის, ჯანმრთელობისა და სოციალური დაცვის სამინისტრო და სსიპ სოციალური მომსახურების სააგენტო თანამშრომლობს შსს-სთან და ელოდება გამოძიების დასრულებას. ფაქტის დადასტურების შემთხვევაში, სამინისტროში აცხადებენ, რომ დააყენებენ შესაბამისი პასუხისმგებელი პირების ადმინისტრაციული პასუხიმგებლობის საკითხს.
"იმის გამო, რომ თემა საკმაოდ მძიმე და სენსიტიურია, გვინდა მოვუწოდოთ საზოგადოებას: ბავშვების ინტერესებიდან გამომდინარე და მათი დაცვის მიზნით - არ მოახდინონ სააღმზრდელო დაწესებულების და შესაბამისად, ბავშვების იდენტიფიცირება. სახელმწიფო უწყებები მზად არიან გამოძიების დასრულების შემდეგ, დაინტერესებულ პირებს მიაწოდონ სრული ინფორმაცია როგორც თავად ფაქტის შესახებ, ასევე იმ ნაბიჯებზე, რომელიც გამოძიების დასკვნის შემდგომ განხორციელდება", - აღნიშნავენ სოციალური მომსახურების სააგენტოში.
