„გირჩის" ოფისში პარტიის წევრებმა და მათი მოთხოვნების მხარდამჭერებმა მარიხუანა საჯაროდ, პირდაპირ ეთერში დათესეს.
„გირჩის“ მოთხოვნაა, რომ გაუქმდეს ყოველგვარი სასჯელი (როგორც ადმინისტრაციული, ასევე სისხლისსამართლებრივი) ნებისმიერი ნარკოტიკული საშუალების მოხმარების გამო. ასევე, მოხდეს საკუთარი მოხმარების მიზნით კანაფის კულტივირებისა და შენახვის ლეგალიზება.
მოგვიანებით, შინაგან საქმეთა სამინისტრომ განცხადება გაავრცელა და აღნიშნა, რომ მათ ნარკოტიკული საშუალების შემცველი მცენარის უკანონო დათესვის ფაქტზე, კანონის მოთხოვნათა შესაბამისად, გამოძიება დაიწყეს.
„2016 წლის 31 დეკემბერს „გირჩის“ ოფისში, ახალი პოლიტიკური ცენტრის წევრებმა, მოხალისეებთან ერთად, საჯაროდ, მათ მიერვე დაანონსებული, წინასწარი ინფორმაციის თანახმად, სავარაუდოდ, ნარკოტიკული საშუალების შემცველი მცენარე დათესეს. გამოძიება ნარკოტიკული საშუალების შემცველი მცენარის უკანონო დათესვის ფაქტზე მიმდინარეობს (საქართველოს სსკ-ს 265-ე მუხლით). პოლიცია შესაბამის საგამოძიებო მოქმედებებს ატარებს", - ნათქვამია განცხადებაში.
„გირჩმა“ 16 ნოემბერს გამართულ პრესკონფერენციაზე განაცხადა, რომ თუ მათი მოთხოვნები არ შესრულდებოდა, ისინი საყოველთაო დაუმორჩილებილობის აქციას გამართავდნენ, კერძოდ, „2016 წლის 31 დეკემბერს, ახალ წლამდე „გირჩის“ წევრები და მათი მოთხოვნების მხარდამჭერები „გირჩის“ ოფისში, პირდაპირ ეთერში, საჯაროდ, ნებისმიერ სრულწლოვან მოხალისესთან ერთად დათესავდნენ მარიხუანას".
მათ 30 ნოემბერს პარლამენტში შესაბამისი საკანონმდებლო წინადადებაც შეიტანეს. იურიდიულმი კომიტეტის მოთხოვნით და პარლამენტის ბიუროს 26 დეკემბრის გადაწყვეტილებით, საკანონმდებლო წინადადების განხილვის ვადა, რეგლამენტის შესაბამისად, 10 დღით გახანგრძლივდა.
