დიდი დიღმის აბონენტები, რომელთაც გუშინ გაზი მაღალი წნევით მიეწოდათ, ბუნებრივ აირს ჩვეულებრივ რეჟიმში იღებენ. ამის შესახებ საინფორმაციო სააგენტო „ინტერპრესნიუსს" შპს „დიდი დიღმის გაზში” განუცხადეს.
მათი თქმით, გაზის მაღალი წნევით მიწოდების გამო, აბონენტებს გაზი ორი საათით შეუწყდათ და მიწოდება გუშინვე - 18:00 საათიდან აღდგა. პრობლემა ამ დროისთვის აღმოფხვრილია.
მათივე ინფორმაციით, აბონენტებს, რომელთაც გაზქურა დაუზიანდა, ზარალი აუნაზღაურება. ამასთან, როგორც „დიდი დიღმის გაზში" განმარტავენ, გაზის მაღალი წნევით მიწოდება გამოიწვია იმან, რომ არ იმუშავა ჩამკეტმა მოწყობილობამ, ე.წ. ავტომატმა, რომელიც „ყაზტრანსგაზის” დანადგარზე დგას. მიმდინარეობს საკითხის შესწავლა.
გუშინ, დიდ დიღომში, პეტრიწის ქუჩაზე ბუნებრივი აირის წნევის მომატების გამო რამდენიმე ბინაში ხანძარი გაჩნდა,- ამ ინფორმაციას ერთ-ერთი მოქალაქე „ფეისბუქის“ გვერდზე ავრცელებს.
როგორც მან „ლიბერალთან“ საუბრისას განმარტა, ბუნებრივი აირის წნევის მომატების გამო სამზარეულოში უცებ აგიზგიზდა ცეცხლი. ამ დროს სახლში ის, მისი შვილი, ფეხმძიმე რძალი და შვილიშვილი იმყოფებოდნენ.
„გარდა მატერიალურისა, ჩემთვის ყველაზე მტკივნეულია ის მორალური ზარალი რაც მივიღე. დღეს მე სიკვდილს ჩავხედე თვალებში. მე და ჩემი შვილი ამაოდ ვცდილობდით ცეცხლის ჩაქრობას, რომ არ დამხმარებოდა მეზობელი და არ გადაეკეტა გაზი, ალბათ წამებში ავფეთქდებოდით“.
„ლიბერალი“ მომხდარის გადასამოწმებლად კომპანია „ყაზტრანსგაზ თბილისს“ დაუკავშირდა, სადაც განმარტეს, რომ დიდი დიღმის გაზმომარაგებაზე შპს „დიდი დიღომი“ ზრუნავს. შპს-ში კი აცხადებენ, რომ ავტომატური სადგური, რომელიც ბუნებრივი აირის წნევას არეგულირებს, „ყაზტრანსგაზს“ ეკუთვნის.
„შეფერხება მოხდა ავტომატურ სადგურზე, რომელიც წნევას ადაბლებს და დაახლოებით 15 წუთის განმავლობაში 4 კორპუსს მაღალი წნევით მიეწოდა გაზი. ჯერჯერობით ვერ ვიტყვით, რა შედეგი შეიძლება მოჰყოლოდა ამას. ჩვენი და „ყაზტრანსგაზის“ თანამშრომლები ადგილზე იმყოფებიან, ზარალს ითვლიან და ვითარებაში ერკვევიან. თუკი იქნება ზარალი, მას ავანაზღაურებთ",- განუცხადეს „ლიბერალს“ შპს „დიდ დიღომში“.
დაზარალებული ქაბატონი „ლიბერალთან“ საუბრისას ადასტურებს, რომ მასთან ნამდვილად იყვნენ კომპანიისა და შპს-ს წარმომადგენლები და ზარალის ანაზღაურებას დაპირდნენ.
