საპარლამენტო უმცირესობა ვიცე-პოლკოვნიკ გიორგი ცერცვაძის საქმეზე გამოძიების 319-ე მუხლით დაიწყებას მოითხოვს, რომელიც უცხო ქვეყნისთვის მტრულ საქმიანობაში დახმარებას შეეხება. „ევროპულ საქართველოში" მიიჩნევენ, რომ საქმეში აშკარად იკვეთება ღალატის ნიშნები საქართველოს ხელისუფლების წარმომადგენლების მხრიდან.
საპარლამენტო უმცირესობის განცხადებას „ლიბერალი" უცვლელად გთავაზობთ:
„გამოვთქვამთ აღშფოთებას ქართველი ჯარისკაცის, 2008 წლის აგვისტოს ომის მონაწილისა და ჩვენი მოძმე უკრაინის ტერიტორიული მთლიანობის დაცვისათვის მებრძოლის უკრაინაში დაკავებასთან დაკავშირებით, რუსეთის მოთხოვნის საფუძველზე. ამ საქმეში აშაკარად იკვეთება ღალატის ნიშნები საქართველოს ხელისუფლების წარმომადგენლების მხრიდან. გასარკვევია, ვინ გადასცა ძალოვანი უწყებების მხრიდან ოკუპანტ ქვეყანას ცერცვაძის პირადი მონაცემები. ხაზგასმით აღვნიშნავთ, რომ საქართველოს სახელმწიფოს უპირველესი მოვალეობაა, იზრუნოს საკუთარ მოქალაქეებსა და მათ უსაფრთხოებაზე, განსაკუთრებით კი ქვეყნისათვის თავდადებული მებრძოლების სიცოცხლისა და თავისუფლების გაფრთხილება.
ყოველივე ზემოთქმულიდან გამომდინარე, საპარლამენტო უმცირესობა - ევროპული საქართველო:
1. დღესვე უგზავნის წერილს უკრაინის შესაბამის უწყებებს გიორგი ცერცვაძის რუსეთისთვის არ გადაცემის მოთხოვნით და საპარლამენტო უმცირესობის ყველა დეპუტატი თავდებში უდგება მას. ასევე, მოვუწოდებთ ყველა სხვა დეპუტატს, რათა შემოუერთდნენ ჩვენს მოწოდებას და მოაწერონ ხელი აღნიშნულ წერილს.
2. დაუყოვნებლივ მოვითხოვთ შინაგან საქმეთა სამინისტროსა და პროკურატურისაგან, გააკეთონ განმარტება თუ როგორ აღმოჩნდა გიორგი ცერცვაძესთან დაკავშირებული ინფორმაცია რუსეთის ძალოვანი სტრუქტურების ხელში.
3. ამ ინფორმაციის რუსეთისთვის გადაცემასთან დაკავშირებით დაუყოვნებლივ უნდა დაიწყოს გამოძიება სისხლის სამართლის კოდექსის 319-ე მუხლით
4. მოვითხოვთ შინაგან საქმეთა მინისტრის დაუყოვნებლივ მოსვლას პარლამენტში და კონკრეტული პასუხების გაცემას ამ საქმეზე.
5. მივმართავთ საგარეო საქმეთა სამინისტროს, რათა დაუყოვნებლივ აღმოუჩინოს საკონსულო და სამართლებრივი დახმარება გიორგი ცერცვაძეს.
6. საქართველოს ხელისუფლებას მივმართავთ ითანამშრომლოს ცერცვაძის ადვოკატთან და მიმართოს ევროსასამართლოს და გაეროს წამების საწინააღმდეგო კომიტეტს, რათა დაიბლოკოს ცერცვაძის ექსტრადიცია უკრაინიდან რუსეთში".
საქართველოს პროკურატურაში, ისევე როგორც შსს-ში აცხადებენ, რომ ცერცვაძის საქმეზე უცხო ქვეყნის ორგანოებთან კომუნიკაცია არ ჰქონიათ.