„სოციალ-დემოკრატები" კონსტიტუციიდან იმ მუხლის (94-ე მუხლის) ამოღებას მოითხოვენ, რომლის მიხედვითაც, ახალი სახის საერთო-სახელმწიფოებრივი გადასახადის შემოღება ან არსებული გადასახადის ზრდა მთავრობის მიერ დანიშნული რეფენდუმით არის შესაძლებელი. აღნიშნული მოთხოვნით პრესკონფერენცია ფრაქციის თავმჯდომარემ, გია ჟორჟოლიამა გამართა. ჟორჟოლიანის თქმით, შესაბამისი ცვლილებები „ეკონომიკური თავისუფლების შესახებ“ კანონშიც უნდა შევიდეს. 

„ეს არის ნაბიჯი, რომელიც გადადგმულია სახელმწიფოს კიდევ უფრო დასუსტებისა და პასუხისმგებლობის მოხსნისკენ ანუ სახელმწიფო იხსნის პასუხისმგებლობას ქვეყანაში არსებულ სოციალურ-ეკონომიკურ ვითარებაზე, პოლიტიკას არ განსაზღვრავს და ზოგად ვითარებას ბაზრის უხილავ ხელს მიანდობს, რისი მოწმეც 25 წელია ვართ. ეს პოლიტიკა უნდა დასრულდეს!“, - განუცხადა გია ჟორჟოლიანმა ჟურნალისტებს

„ეკონომიკური თავისუფლების შესახებ“ კანონის მიხედვით, საერთო სახელმწიფოებრივი გადასახადია: საშემოსავლო გადასახადი, მოგების გადასახადი, დამატებული ღირებულების გადასახადი, იმპორტის გადასახადი, აქციზი (აქციზს კონსტიტუციის 94-ე მუხლის თანახმად, აღნიშნული შეზღუდვები არ ეხება).

კონსტიტუციის 94-ე მუხლის მე-4 პუნქტის თანახმად, საერთო-სახელმწიფოებრივი გადასახადის ახალი სახის შემოღება, გარდა აქციზისა, ან საერთო-სახელმწიფოებრივი გადასახადის სახის მიხედვით არსებული განაკვეთის ზედა ზღვრის გაზრდა შესაძლებელია მხოლოდ რეფერენდუმის გზით, გარდა ორგანული კანონით გათვალისწინებული შემთხვევებისა. რეფერენდუმის დანიშვნის ინიცირების უფლება აქვს მხოლოდ საქართველოს მთავრობას.