„აზოტის ქარხნიდან" გათავისუფლებული მუშების სოლიდარობის აქცია თბილისში დასრულებულია. აქციის მონაწილეებმა მსვლელობა ვარდების მოედნიდან თავისუფლების მოედნამდე მოაწყვეს. ბოლოს კი „საქართველოს ბანკის" ოფისთან შეიკრიბნენ. მათ ბანკის ხელმძღვანელობასთან უნდოდათ შეხვედრა, თუმცა უპასუხეს, რომ მენეჯერები არ იყვნენ ოფისში. 

აქცია-მსვლელობას პოლიციის ათობით თანამშრომელი მოჰყვებოდა. რამდენჯერმე გზიდან გადასვლის მოთხოვნით, მათსა და აქციის მონაწილეებს შორის სიტყვიერი შელაპარაკება მოხდა. პოლიცია იცავდა „საქართველოს ბანკის" ოფისსაც და მონაწილეებს ახლოს მისვლის უფლებას არ აძლევდა. 

„აზოტის ქარხნიდან" გათავისუფლებული 30-მდე თანამშრომელიც იმყოფებოდა დღეს აქციაზე. თამარ ბუჩუკური ერთ-ერთი მათგანია. ამბობს, რომ რამდენიმე დღის წინ მათ ქარხნიდან დაუკავშირდნენ და უთხრეს, რომ კომპენსაციის გადახდის შესახებ საბუთს ხელი უნდა მოაწერონ:

„ზოგმა ჩვენგანმა მოაწერა, მაგრამ ბევრი არ ვართ თანახმა. არც მე. 500 ლარი თვეში, პლუს, დაკავებული საკომისიო, სრულიად შეურაცხმყოფელია. ამიტომ, ჩვენ არ დავთანხმდებით კომპანიის შემოთავაზებას და აღდგენის მოთხოვნით გავაგრძელებთ პროტესტს".

აქციები „აზოტის ქარხნის" მუშების სოლიდარობის ნიშნად ამ კვირაში აღდგება. ზუსტი თარიღი, ჯერჯერობით, გადაწყვეტილი არაა.