საზოგადოებრივი მაუწყებლის ეთერში იუსტიციის მინისტრმა თეა წულუკიანმა ე.წ. ციანიდის საქმეზე ისაუბრა და მეუფე პეტრე ცაავას ერთ-ერთი განცხადება შეაფასა.
“ამ ბოლო დღეებში ძალიან ბევრს ვუსმენთ ერთ-ერთ მეუფეს, დასავლეთ საქართველოდან, ყველა არხზე და თითქოს ტენდენციაც არის რომ არავინ მას არ უნდა დაეთანხმოს და თითქოს ის შეტევაზეა, ის მართლაც შეტევაზეა მაგრამ ეს არ არის მთავარი, მთავარი არის ის რომ (მე მას მართალია ყველა ეთერში ვერ ვუსმინე ამას მოთმინება სჭირდება, რომელიც მე ასეთი დოზით არ მაქვს) ერთ რამეში მინდა დავეთანხმო და ხაზი გავუსვა ძალიან დიდ სიმართლეს, რომელიც მან თქვა. მან თქვა რომ 2004 წელშიც იყო ეჭვები, რომ პატრიარქის წინააღმდეგ რაღაც იგეგმებოდა, შემდეგ 2009 წელშიც საოცრებები დაიწერაო რომ პატრიარქის მოწამვლა სცადესო და საერო ხელისუფლებას არ ეყოფა გამბედაობა გამოძიება დაეწყოო და ამ გამოძიებაში ღმერთის ხელი ურევიაო. მე არ ვარ ის პირი, რომელიც თავს უფლებას მისცემს ისაუბროს სად არის ღმერთის ხელი და სად არაა, მაგრამ ამაში უნდა დავეთანხმოთ მას რომ ამ ხელისუფლებას დიახ ეყო გამებდაობა რომ ეთქვა: ამას მე არ დავუშვებ და გამოძიებას ჩავრთავ. ამიტომაც მივესალმები ეკლესიის ზოგად პოზიციას, რომ ისინი ენდობიან გამოძიებას.” - განაცხადა თეა წულუკიანმა.
