დღეს მთავრობის სხდომაზე საქართველოს ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრის, სოზარ სუბარის განცხადებით, 650 000 ლარი გამოიყოფა აფხაზეთის ომის დროს დაღუპულთა იდენტიფიცირებისთვის. მინისტრის განცხადებით, პროცესში აფხაზური მხარეც იქნება ჩართული
„სამინისტროს ბიუჯეტიდან გამოიყოფა 650 000 ლარი გენეტიკური მასალის ასაღებად, დაახლოებით 1000 ადამიანიდან - აფხაზეთს ომის დროს უგზოუკვლოდ დაკარგულთა ოჯახის წევრებისგან, რაც შესაძლოა, გამოგვადგეს სწორედ დაღუპულთა იდენტიფიცირებისთვის.
ეს პროგრამა წარმატებით მიმდინარეობს. ორივე მხარეა ჩართული, როგორც აფხაზური, ისე ქართული. შუამავლობას გვიწევს საერთაშორისო წითელი ჯვარი. მთლიანობაში წელს მეტი საქმე გაკეთდება, ვიდრე წინა წლების განმავლობაში“, - განაცხადა სოზარ სუბარმა.