თბილისის მერმა, დავით ნარმანიამ, საკრაბულოში 2016 წლის ანგარიშის წარდგენისას საკრებულოს დეპუტატებს თბილისში გამწვანების მხრივ გატარებული ღონისძიებები გააცნო. მისი თქმით, გამწვანება დედაქალაქის მთავრობისთვის ერთ-ერთი მთავარი მიმართულებაა.

„გამწვანება ეს გახლავთ ერთ-ერთი მთავარი მიმართულება, რომელიც დედაქალაქის მთავრობისთვის უმნიშვნელოვანესია. 2014 წლიდან დღემდე, თბილისსა და მის შემოგარენში სულ 650 000-მდე ხე-მცენარეა დარგული. გარდა ამისა, გასულ წელს დედაქალაქში 30 ახალი სკვერი მოეწყო, ხოლო რეაბილიტაცია 249 სკვერს ჩაუტარდა. მათ შორისაა იაპონური ბაღი ბოტანიკურ ბაღში, რომელიც იაპონური ხელოვნების თვალსაჩინო ნიმუში გახლავთ. გავამწვანეთ და კეთილმოვაწყეთ თამარაშვილის ქუჩის გზაგამყოფი ხეივანი. კეთილმოვაწყეთ ვერის პარკი და სხვა სკვერები. მნიშვნელოვანი გამწვანებითი ღონისძიებები გატარდა ე.წ. „ახალ გზაზე“, სადაც მიუხედავად ათასგვარი წინასწარი ვერსიისა, ნერგების უმრავლესობამ გაიხარა“, - განაცხადა დავით ნარმანიამ.

თბილისის მერმა დასუფთავების შესახებაც ისაუბრა და განაცხადა, რომ დედაქალაქის მასშტაბით დღეს ჯამში 18 974 ცალი ნაგავშემკრები კონტეინერია განთავსებული, აქედან 2800 ერთეული კონტეინერი შპს „თბილსერვის ჯგუფმა“ 2016 წელს შეისყიდა. მისივე თქმით, გასულ წელს შეიძინეს 30 ერთეული თანამედროვე დამხმარე საშუალება და 5 ერთეული სპეციალური ტექნიკა.