„საქართველოს დემოგრაფიული საზოგადოება 21-ის" დირექტორმა ზვიად ტომარაძემ პარლამენტს საკანონმდებლო წინადადებით მიმართა, რომლითაც იგი უცხო ქვეყნებიდან დაფინანსებული ორგანიზაციების საქმიანობის აკრძალვის შესაძლებლობის კანონის დონეზე დაშვებას მოითხოვს.

ტომარაძე მიიჩნევს, რომ „საზოგადოებრივ გაერთიანებათა საქმიანობის შეჩერებისა და მათი აკრძალვის შესახებ" საქართველოს ორგანულ კანონს შემდეგი ჩანაწერი უნდა დაემატოს:

„სასამართლოს, საქართველოს მთავრობის მოთხოვნის საფუძველზე ასევე შეუძლია აკრძალოს ის საზოგადოებრივი გაერთიანება, რომელიც უცხოეთის სახელმწიფოდან, უცხოური სამეწარმეო ან არასამეწარმეო ორგანიზაციიდან ან უცხოელი მოქალაქისგან მიღებული გრანტის ფარგლებში ახორციელებს გრანტის გამცემის ინტერესებს საქართველოს სახელმწიფოს ინტერესების საწინააღმდეგოდ", - ნათქვამია წინადადებაში.

ბიუროს გადაწყვეტილებით, შესაბამისი წინადადების განხილვა პარლამენტის იურიდიულ საკითხთა კომიტეტს დაევალა.