გერმანიის პოლიცია იძიებს გუშინ დორტმუნდში საფეხბურთო კლუბ „ბორუსიის“ ავტობუსის აფეთქებას და ექსტრემისტების შესაძლო კავშირს მომხდართან. ამის შესახებ ინფორმაციას გერმანული მედია ავრცელებს.
BBC-ის ცნობით, აფეთქების ადგილთან ახლოს იპოვეს წერილი, რომლის შინაარსიც ეხება ბერლინში საშობაო ბაზრობაზე მომხდარ ტერაქტსა და სამხედრო ოპერაციებს სირიაში. პოლიცია მუშაობს, რომ დაადგინონ, არის თუ არა წერილი ნამდვილი. გერმანული გაზეთის Sueddeutsche Zeitung-ის ცნობით, წერილი იწყება ფრაზით - „ალაჰის სახელით“. გამოცემის ცნობით, შინაარსი ასევე ეხება კოალიციის ძალების ბრძოლას „ისლამური სახელმწიფოს“ წინააღმდეგ. ამავე მედიის ცნობით, შესაძლებელია, წერილი გამოძიების შეცდომაში შეყვანის მიზნით იყო დატოვებული.
არსებობს სხვა ვერსიაც, რის გამო შეიძლებოდა მომხდარიყო საფეხბურთო კლუბის ავტობუსის აფეთქება. გავრცელებული ინფორმაციით, ანტიფაშისტური ჯგუფის ონლაინგვერდზე გამოქვეყნდა წერილი, რომლის მიხედვით, აფეთქება მოტივირებული იყო საფეხბურთო კლუბის რასისტული და არატოლერანტული დამოკიდებულებებით.
გუშინ გერმანული საფეხბურთო კლუბის დორტმუნდის „ბორუსიის“ ავტობუსი აფეთქდა. საფეხბურთო კლუბი ჩემპიონთა ლიგის თამაშზე მიდიოდა. დორტმუნდის „ბორუსიასა“ და საფეხბურთო კლუბ „მონაკოს“ მეოთხედფინალური თამაში უნდა გამართულიყო. გავრცელებული ინფორმაციით, დაშავდა ერთი ფეხბურთელი, მარკ ბარტრა. BBC-ის ცნობით, მას ოპერაცია გაუკეთეს. სხვა ფეხბბურთელები და კლუბის წევრები არ დაშავებულან.
უეფას გადაწყვეტილებით გუშინ თამაში მომხდარის გამო გადაიდო და ის დღეს 20:45 წთ-ზე დაიწყება.
