„დაიცავით ჩვენი შრომა!“, - ქალთა შრომითი უფლებების დასაცავად მთავრობის კანცელარიასთან „ქალთა ფონდი საქართველოს“ მხარდაჭერით აქცია გაიმართა.

აქციის მონაწილეთა მოთხოვნით, უნდა შეიქმნას გენდერულად მგრძნობიარე შრომის ინსპექცია, რადგან ქალთა დისკრიმინაცია შრომით ურთიერთობებში ფართოდ არის გავრცელებული.

„დღეს ჩვენი ხმა უნდა გაიგოს სახელმწიფომ. არ კმარა მხოლოდ ფორმალური თანხმობა დასავლურ და ევროპულ ღირებულებებთან. ჩვენ უნდა შევქმნათ ქვემოდან დაწყებული აქტივისტური ჯგუფების მიერ ორგანიზებული მშრომელთა არაფორმალური კავშირები, რომლებიც სახელმწიფოს მოსთხოვენ, გაატაროს შედეგზე ორინტირებული პოლიტიკა. დღეს ჩვენ კანცელარიასთან ვდგავართ იმიტომ, რომ მთავრობას აქვს მნიშვნელოვანი როლი, შემუშავებულ პაკეტზე განაცხადოს თანხმობა და მიიღოს ქმედითი შრომის ინსპექცია.ჩვენ გავაგრძელებთ დაკვირვებას თუ რამდენად იქნება ინსპექცია გენდერულად მგრძნობიარე და რამდენად აღმოაჩენს ინსპექცია ქალების ორმაგ ჩაგვრას დასაქმების ადგილზე.“,- თქვა „ქალთა მზერის“ წევრმა, გვანცა ხონელიძემ.

აქციის მონაწილეებს მიაჩნიათ, რომ შრომის ინსპექციამ ყურადღება უნდა მიაქციოს ქალთა სპეციფიკურ საჭირობებს და შეისწავლოს:

1. ორსულობის, მშობიარობის, დედობითა და გენდერული ნიშნით გამოწვეული დისკრიმინაციის ფაქტები;
2. სამუშაო ადგილზე სექსუალური შევიწროების ფაქტები;
3. ქალებისა და კაცების საშუალო თვიურ ხელფასს შორის 36% განსხვავების მიზეზები;
4. სამუშაო ადგილზე ქალის მიერ გაწეული აუნაზღაურებელი შრომა.

აქციის მონაწილეები საქართველოს მთავრობას მიმართავენ, გამოიჩინონ პოლიტიკური ნება და შეიქმნას სააღმსრულებლო ფუნქციის მქონე შრომის მონიტორინგის მექანიზმი;
კერძო სექტორმა კი აიღოს სოციალური პასუხისმგებლობა და უზრუნველყოს არადისკრიმინაციული და უსაფრთხო შრომითი გარემო.