ფრაქცია „ქართული ოცნების” თავმჯდომარის მამუკა მდინარაძის შეფასებით, საქართველოს ეროვნული პლატფორმის წევრი 85 არასამთავრობო ორგანიზაციის განცხადება საკონსტიტუციო ცვლილებებთან დაკავშირებით საზოგადოების შეცდომაში შეყვანის მცდელობაა. როგორც მდინარაძემ აღნიშნა, ამავე ლოგიკით არათანაბარ პირობებში ჩაყენებად შეიძლება ჩაითვალოს მაჟორიტარული სისტემა, რომელიც მთელს მსოფლიოში ლეგიტიმურადაა მიჩნეული.
„ჩემი აზრით, ასეთი განცხადებები საზოგადოების შეცდომაში შეყვანის დამატებითი მცდელობაა, იქიდან გამომდინარე, რომ ამ ლოგიკით უნდა ვიმსჯელოთ, რომ ნებისმიერი მაჟორიტარული სისტემა, რომელიც აბსოლუტურად ლეგიტიმურადაა მიჩნეული მთელს მსოფლიოში, თანასწორობის პრინციპს არღვევს. ყველა საარჩევნო სისტემა, რომელიც უზრუნველყოფს პლურალიზმს, ქვეყნის სტაბილურობას და არის დემოკრატიულად მიჩნეული, აღიარებული მათ შორის განვითარებული ქვეყნების შესაბამისი ექსპერტების, კომისიების მიერ აბსოლუტურად ლეგიტიმურია და თუ ჩვენს შემთხვევაში ეს სისტემა დაინერგება, ბუნებრივია, ამასთან დაკავშირებით ზედმეტი კითხვები ვეღარ დაისმება”, - განაცხადა მდინარაძემ.
საქართველოს ეროვნული პლატფორმის წევრი 85 არასამთავრობო ორგანიზაცია საქართველოს პარლამენტს სპეციალური განცხადებით მიმართავს. არასამთავრობო ორგანიზაციების მიერ გავრცელებულ განცხადებაში აღნიშნულია, რომ კონსტიტუციაში შესატანი ცვლილებების თანახმად, საპარლამენტო მანდატების განაწილების ახალი წესი ვერ უზრუნველყოფს პარლამენტში პოლიტიკური პარტიების პროპორციულ წარმომადგენლობასა და მდგრადი მრავალპარტიული სისტემის დამკვიდრებას. არასამთავრობო ორგანიზაციები აღნიშნავენ, რომ წარმოდგენილი წესით ირღვევა სამართლიანი არჩევნების ძირითადი თანასწორობის პრინციპი.
