მერიის ზედამხედველობის სამსახურმა ე.წ ნავთლუღის ბაზრის მიმდებარე ტერიტორიიდან გარევაჭრობისთვის განკუთვნილი კონსტრუქციები გაიტანეს.
მერიაში აცხადებენ, რომ ზედამხედველობის საქალაქო სამსახურის წარმომადგენლებმა მოვაჭრეები რამდენჯერმე გააფრთხილეს, შეეწყვიტათ უნებართვო სამეწარმეო საქმიანობა.
თბილისის მერის მოადგილის, გიგა ნიკოლეიშვილის განცხადებით, ტერიტორიის გასუფთავების შემდეგ თბილისის მერიის კეთილმოწყობის საქალაქო სამსახური საგზაო ინფრასტრუქტურის სარეაბილიტაციო სამუშაოებს დაიწყებს.
,„უნებართვო გარევაჭრობის აღსაკვეთად ღონისძიებები გრძელდება. ამჯერად გარევაჭრობისთვის განკუთვნილი უნებართვო კონსტრუქციებისგან ნავთლუღის ბაზრის მიმდებარე ტერიტორია გათავისუფლდა. უახლოეს პერიოდში კეთილმოწყობის საქალაქო სამსახური აქ გზისა და ტროტუარის სარეაბილიტაციო სამუშაოებს დაიწყებს", - განაცხადა გიგა ნიკოლეიშვილმა.
მერიის განცხადებით, ბაზრობების ასოციაცია ექვსი თვის განმავლობაში შეღავათიანი პირობებით გარემოვაჭრეებს სამეწარმეო საქმიანობისთვის ადგილებს გამოუყოფს, ბაზრობების დირექცია კი მეწარმეებს პროდუქციის კონკურენტუნარიან პირობებში სარეალიზაციოდ ყველა პირობას შეუქმნის.