მეორე მსოფლიო ომში გამარჯვების დღესთან დაკავშირებით საქართველოში მცხოვრები ომის ვეტერანები ტრადიციულად სახელმწიფოსაგან ერთჯერად პრემიას მიიღებენ. ინფორმაციას შრომის, ჯანმრთელობისა და სოციალური დაცვის სამინისტრო ავრცელებს.

როგორც განცხადებაშია ნათქვამი, მთავრობის 838-ე დადგენილების შესაბამისად, სოციალური მომსახურების სააგენტომ  საქართველოს რეგიონებში მცხოვრებ მეორე მსოფლიო ომის ვეტერანებსა და ომში დაღუპულთა ოჯახის წევრებს 3 მაისის მდგომარეობით სრულად გადაურიცხა თანხა. 

უწყების ცნობითვე, 9 მაისის გასაცემელი ეძლევათ - მეორე მსოფლიო ომის ვეტერანებს - 600 ლარის ოდენობით, ომში დაღუპულთა ოჯახის წევრებს კი - 300 ლარის ოდენობით. გასაცემელი განკუთვნილი იყო სულ 883 ბენეფიციარზე, მათგან 592 მეორე მსოფლიო ომის მონაწილეა, 291 კი - ომში დაღუპულთა ოჯახის წევრი. 

4 მაისიდან ამ ბენეფიციარებს შესაძლებლობა აქვთ, „ლიბერთიბანკის“ ანგარიშებიდან მიიღონ კუთვნილი თანხა. თბილისში მცხოვრები ვეტერანებისა და ომში დაღუპულთა ოჯახის წევრებისათვის თანხას დედაქალაქის მერია რიცხავს.