საქართველოს ენერგეტიკის მინისტრის, კახა კალაძის განცხადებით, ფასანაურში გამართული აქცია არასამთავრობო ორგანიზაცია „მწვანე ალტერნატივის“ პროვოცირებულია. მინისტრის თქმით, პროექტის განხორციელებას ხელს ვერავინ შეუშლის

„ეს არის გარკვეული დაჯგუფება, არასამთავრობო ორგანიზაცია „მწვანე ალტერნატივა“, რომელიც აბუნტებს იქ გარკვეულ ადამიანებს და შეჰყავთ შეცდომაში, იძლევიან არასწორ ინფორმაციას, თითქოს ეს ელექტროგადამცემი ხაზები არის ჯანმრთელობის დამაზიანებელი. მთავარი და მნიშვნელოვანი არის ის, რომ ხაზები დაშორებულია მოსახლეობიდან დაახლოებით 100-150 მეტრით, არის ერთი კონკრეტული მონაკვეთი, სადაც 40 მეტრია დაშორება, ანუ ყველანაირ სტანდარტში ჯდება. ასე რომ, ვერავინ ვერ შეაჩერებს ქვეყნისთვის მნიშვნელოვან და სტრატეგიულ პროექტს”, - ამბობს კახა კალაძე

გუშინ ხანდოში ქსანი-სტეფანწმინდის ელექტროგადამცემი ხაზის პროექტის გასაპროტესტებლად რამდენიმე სოფლის მოსახლეობა შეიკრიბა. პოლიციისთვის წინააღმდეგობის გაწევის გამო აქციის 6 მონაწილე დააკავეს. შსს-ს ინფორმაციით, გამოძიება ადმინისტრაციული სამართალდარღვევათა კოდექსის 173 მუხლით მიმდინარეობს.