სახელმწიფო აუდიტის სამსახურის ხელმძღვანელის ლაშა თორდიას განცხადებით, მას გუშინ თავს დაესხა ყოფილი მთავარი პროკურორი ოთარ ფარცხალაძე და მასთან ერთად მყოფი რამდენიმე პირი. მისი თქმით, ყოფილი მთავარი პროკურორის აგრესია ერთ-ერთმა საქმემ გამოიწვია, რომელშიც ოთარ ფარცხალაზე ფიგურირებს.
„შეხვედრის დროს აგრესიული ტონით მითხრა, რატომ ვაგროვებდი მასზე კომპრომატებს, ასევე როგორ ვაპირებდი ცხოვრების გაგრძელებას ვადის გასვლის შემდგომ. ვუპასუხე, რომ ასე ესაუბრა მასთან, ვისთანაც ამის საშუალება ჰქონდა. ამ დროს ზედმეტი აგრესია გამოხატა და დამარტყა ხელი, რასაც მისი თანხმლები პირების მხრიდანაც მოჰყვა თავდასხმა. ეს არის პირადი ანგარიშსწორება, რომელიც კონკრეტულ საქმეს ეხება, სადაც მისი სახელი და გვარი ფიგურირებს. ადამიანს აქვს სრული დაუსჯელობის განცდა, ვინაიდან ამ კლუბში, ძალიან ბევრი ადამიანი იმყოფებოდა და ამ ადამიანების თვალწინ მოხდა ეს ყველაფერი”, - განაცხადა ლაშა თორდიამ, რომელიც ამჟამადაც საავადმყოფოში იმყოფება.
როგორც გენერალურმა აუდიტორმა აღნიშნა, საზოგადოება 15 მაისს გაიგებს კონკრეტული საქმის შესახებ ინფორმაციას.
„მას თუ გონია, რომ ამით რაღაც შიშს დანერგავს და ვიღაც რაღაცას გადაასწორებს, ძალიან ცდება. ორშაბათს კოკრეტულ ინფორმაციას მიიღებთ კონკრეტულ საქმესთან დაკავშირებით თუ რაზეა საუბარი”, - განაცხადა თორდიამ.
