7 წლის და ზემოთ ასაკის აუტიზმის მქონე ბავშვებისთვის დაფინანსებული სეანსების რაოდენობა შესაძლოა შემცირდეს.
თბილისის მერიამ „აუტიზმის სპექტრის დარღვევის მქონე ბავშვთა რეაბილიტაციის“ ქვეპროგრამის წესში ცვლილებები შეიტანა და პროექტი უახლოეს დღეებში დედაქალაქის საკრებულოს გადაეგზავნება განსახილველად.
წესში შეტანილ ცვლილებებზე ინფორმაცია დღეს გამოქვეყნდა მერიის ვებგვერდზე.
შეგახსენებთ, რომ წესში ცვლილებებს აუტიზმის მქონე ბავშვების მშობლები მოითხოვდნენ და ამ მიზნით ორიოდე თვის წინ არერთი აქცია გაიმართა. მშობლები პროგრამაში იმ ბავშვების ჩასმას მოითხოვდნენ, რომლებსაც თბილისში რეგისტრაციის თარიღის გამო უთხრეს უარი და ასეთი სულ 36 მდე ბავშვი იყო.
მერიამ მშობლების მოთხოვნა გაითვალისწინა თუმცა, როგორც დღეს მერიის განცხადებიდან გახდა ცნობილი, ამ ცვლილებასთან ერთად მერია 7 წლის და ზემოთ ასაკის ბავშვებისთვის დაფინანსების წესით შეცვალასაც გეგმავს.
ცვლილებების პროექტის მიხედვით, 7 წლის და ზემოთ ასაკის ბავშვებს მერია 20 სეანსის ნაცვლად, 15 სეანსს დაუფინანსებს.
თბილისის მერიის ჯანდაცვისა და სოციალური მომსახურების საქალაქო სამსახურის წარმომადგენლის განმარტებით აღნიშნული ცვლილება მერიამ სერვისის მომწოდებლებთან კონსულტაციის შედეგად მიიღო და აუტიზმის რეაბილიტაციის სფეროში მომუშავე სპეციალისტებთან შეთანხმებულია.
ცვლილებას არ ეთანხმება „ოჯახები დისკრიმინაციის წინააღმდეგ - FAD“ ორგანიზაციის წარმომადგენელი მარი კორკოტაძე. კორკოტაძემ „ლიბერალთან“ საუბრისას განაცხადა, რომ ეს ცვლილება, რომელიც 7 წლის და ზემოთ ასაკის ბავშვების დაფინანსებას ეხება მშობლებთან შეთანხმებული არ ყოფილა და იმედს გამოთქვამს, რომ საკრებულო „აუტიზმის სპექტრის დარღვევის მქონე ბავშვთა რეაბილიტაციის“ პროგრამაში ცვლილებებს არ მიიღებს.
