თბილისის საქალაქო სასამართლოში, სადაც დეკანოზ გიორგი მამალაძის საქმეს განიხილავენ, ბრალდების მხარე პროცესის სრულად დახურვას მოითხოვს. პროკურატურის თქმით, საქმეში არსებული მტკიცებულებები შეიცავს მესამე პირთა პირადი და ინტიმური ცხოვრების დეტალებს, რის შესახებაც მამალაძე ამ ჩანაწერებში საუბრობს. ამიტომ ამ პროცესის ღიად წარმართვა მესამე პირთა პირადი ცხოვრების უფლებას დაარღვევს.
დეკანოზ გიორგი მამალაძის ადვოკატის, მიხეილ რამიშვილის თქმით, აქამდე სხდომების დახურვის შუამდგომლობის მოტივი მამალაძის ოჯახის დაცვის განსაკუთრებული ღონისძიებით სარგებლობა იყო. მესამე პირის პირადი ცხოვრების შესახებ არაფერი თქმულა.
სხდომაზე გიორგი მამალაძის მეორე ადვოკატის, გიორგი ფანცულაიას თქმით, სატელეფონო და კომპიუტერულ მიმოწერას პროკურატურა შანტაჟისთვის იყენებს. მისი თქმით, ბრალდების დოკუმენტში საერთოდ არაა მოხსენებული ეს მიმოწერა და ამას არაფერი აქვს საერთო მამალაძის საქმესთან. ფანცულაია აღნიშნავს, რომ მამა გიორგი მამალაძეს არაფერი აქვს დასამალი.
„ვის გამოც პროკურატურა დახურვას ითხოვს, ის ადამიანი მოწმეების სიაში არაა, არ დაიკითხება. უბრალოდ ამ ჩანაწერებში მამა გიორგი მასზე საუბრობს. ამიტომ ვერანაირად ვერ შელახავს ეს ამ პირის პირადი ცხოვრების უფლებას“, - განაცხადა გიორგი ფანცულაიამ.
პროკურორის თქმით, აუდიო- და ვიდეოჩანაწერებში, ისევე, როგორც მისი ტელეფონიდან ამოღებულ ზარებსა და მესიჯებში გიორგი მამალაძე სასულიერო პირისთვის მიუღებელი სახით ჩანს.
„ეს მტკიცებულებები შეიცავს ინტიმურ დეტალებს, რაც ასევე მიუღებელია სასულიერო პირისთვის. როცა ქვეყნის მოსახლეობის უმეტესობა მართლმადიდებელია, ამ ინფორმაციის გაჟღერებამ შეიძლება საზოგადოებრივ წესრიგს შეუქმნას საფრთხე. გასაჯაროვდება ისეთი დეტალები, რომელიც სასულიერო პირის ზნეობრივ ნორმებს ეწინააღმდეგება", - ამბობს ბრალდების მხარე.