დეკანოზ მამალაძის ადვოკატებმა სააპელაციო სასამართლოში მოსამართლე ბუგიანიშვილის 19 მაისს მიღებული განკარგულება გაასაჩივრეს.
19 მაისს მოსამართლემ სასამართლო სხდომიდან დეკანოზის ადვოკატების გაძევების გადაწყვეტილება მიიღო. თბილისის საქალაქო სასამართლოს მიერ გავრცელებული განცხადების მიხედვით, ადვოკატები სხდომიდან სასამართლოს უპატივცემულობისა და წესრიგის დარღვევისათვის გააძევეს.
„ბრალდებულმა და დაცვის მხარემ პროტესტის ნიშნად სასამართლოს სხდომის დარბაზი დატოვეს, რასაც სისხლის სამართლის საპროცესო კანონმდებლობა არ იცნობს. სასამართლომ მოუწოდა დაცვის მხარეს წესრიგის დაცვისაკენ, ვინაიდან, სასამართლოს მითითებას ადვოკატები არ დაემორჩილნენ, სასამართლოს უპატივცემულობისა და წესრიგის დარღვევისათვის სამივე ადვოკატი გაძევებულ იქნა სხდომის დარბაზიდან. აღნიშნულის თაობაზე, სასამართლომ გამოიტანა კერძო განჩინება, რომელიც გადაეგზავნება ადვოკატთა ეთიკის კომისიას.
ბრალდებულის უფლებებს მომდევნო სხდომაზე სახაზინო წესით დანიშნული ადვოკატი დაიცავს. სასამართლო განხილვა 30 მაისს 11:00 საათზე გაგრძელდება. ბრალდებულს, მომდევნო სხდომაზე გამოცხადების თაობაზე, დადგენილი წესით გაეგზავნება უწყება და არასაპატიო მიზეზით სხდომაზე გამოუცხადებლობა მიჩნეულ იქნება სასამართლოსთვის თავის არიდებად, შესაბამისად, საქმის განხილვა მისი მონაწილეობის გარეშე გაგრძელდება." - წერია საქალაქო სასამართლოს განცხადებაში.
