აფგან მუხთარლის ადვოკატები ამბობენ, რომ მის მოტაცებაში ქართველი პირებიც მონაწილეობდნენ, - ამის შესახებ „ლიბერალს" აფგანის მეგობრის, დაშგინ აგარალრის ადვოკატმა შოთა თუთბერიძემ უთხრა.
დაშგინ აგარალრი დღეს გამოკითხვაზე სხვა რამდენიმე პირთან ერთად გადაიყვანეს.
TDI-ის ადვოკატი შოთა თუთბერიძე ამბობს, რომ აგარალრის თქმით, მასსა და აფგან მუხთარლის უკვე ერთი წელია უთვალთვალებენ.
„ხშირად შეუმჩნევიათ უცნობი პირები, რომლებიც აედევნებოდნენ და ფოტოებს უღებდნენ ხოლმე. იყო შემთხვევა, როცა გატაცებულმა ჟურნალისტმა სახლში იპოვა მისთვის და დაშგინისთვის უცნობი პირების მიერ გადაღებული ფოტოები. მიანიშნეს, რომ უთვალთვალებდნენ. როგორც დაშგინი ამბობს, ამის შესახებ სახალხო დამცველს და სხვა უწყებებსაც აცნობეს", - ამბობს თუთბერიძე.
მისი თქმით, ამ ეტაპზე ადვოკატები ქართული მხარის გამოძიებით კმაყოფილები არ არიან.
„ამ ეტაპზე პოლიცია უმოქმედოდ გვეჩვენება. თავდაპირველად უარს აცხადებდნენ საგამოძიებო მოქმედებებზე იმ მიზეზით, რომ არ იყო ჟურნალისტის ბაქოში ყოფნა დადასტურებული. მას შემდეგ რაც დადასტურდა, გამოკითხვის ეტაპზე გადავედით. აზერბაიჯანელი ადვოკატები გვეუბნებიან, რომ გატაცებაში ქართველი პირებიც მონაწილეობდნენ. სავარაუდო ინფორმაციით, ორჯერ გამოიცვალეს მანქანა და გადაკვეთეს საზღვარი", - ამბობს თუთბერიძე.
ადვოკატი რამდენიმე ვერსიაზე საუბრობს:
„სავარაუდოა, რომ საზღვარზე გადაყვანა დიპლომატიური მანქანით მოხდა. ფაქტია, რომ ქართული სასაზღვრო პუნქტი გადაილახა ისე, რომ საპასპორტო კონტროლი არ მომხდარა. ადამიანი, რომელიც სახლში მიდიოდა, გაქრა და ბაქოში აღოჩნდა. ეს არის ქვეყანა, საიდანაც ჟურნალისტი იმის გამო გამოიქცა, რომ ჟურნალისტია. შეიძლება, რომ ჟურნალისტი საშინაო ტანსაცმელში, უსაბუთოდ, უფულოდ გადასულუყო აკრძალულ ხაზზე ისე, რომ ქართველებს გაექცა და აზერბაიჯანულ მხარეს ვერა?! ცხადია, ეს აბსურდია, რომელსაც, სავარაუდოდ, აზერბაიჯანული მხარე გამოიყენებს. ჩნდება შეკითხვა, თუ რატომ უნდა მოქცეულიყო ასე, როცა მოქმედი პასპორტი აქვს, საზღვრის გადაკვეთა შეუძლია და არავითარი დარღვევა არ აქვს ჩადენილი. მით უმეტეს, რატომ უნდა დაბრუნებულიყო ქვეყანაში, საიდანაც გამოიქცა", - ამბობს თუთბერიძე.
