საქართველოს შინაგან საქმეთა მინისტრმა, გიორგი მღებრიშვილმა აფგან მუხთარლის საქმესთან დაკავშირებით ბრიფინგი გამართა. მინისტრის განცხადებით, ალბათობა იმისა, რომ საზღვრის რომელიმე წერტილი ადამიანმა მესაზღვრის გვერდის ავლით გადაკვეთოს დაბალია, მაგრამ არსებობს. მღებრიშვილის თქმით, აზერბაიჯანის მხარის განცხადება, რომ მუხთარლიმ საზღვარი უკანონოდ გადაკვეთა, ამ ეტაპზე საქმეში არსებული ერთადერთი ოფიციალურად და სამართლებრივად გამყარებული გარემოებაა

„მოგეხსენებათ, რომ ოჯახის წევრების მხრიდან აფგან მუხთარლის გაუჩინარების შესახებ ინფორმაციის გავრცელებისთანავე შინაგან საქმეთა სამინისტრომ დაიწყო გამოძიება სსკ 143-ე მუხლით, რაც თავისუფლების უკანონოდ აღკვეთას გულისხმობს, გამოძიების ფარგლებში აღნიშნულ თემასთან დაკავშირებით შედგა კომუნიკაცია აზერბაიჯანულ მხარესთან, აზერბაიჯანის შესაბამისი უწყებებისგან მივიღეთ ოფიციალური ინფორმაცია, რომ მათი მოქალაქე მუხთარლი დაკავებული იქნა აზერბაიჯანის სახელმწიფო სასაზღვრო სამსახურის თანამშრომლების მიერ აზერბაიჯანის რესპუბლიკის ბალატენსკის რაიონის მიმართულებით, საქართველოს მხრიდან სახელმწიფო საზღვრის უკანონო გადაკვეთისა და დიდი ოდენობით არადეკლარირებული უცხოური ვალუტის საქართველოდან აზერბაიჯანში კონტრაბანდის სახით გადატანის გამო.

საზოგადოებას გვინდა, ვამცნოთ, რომ საქართველოს სასაზღვრო პოლიცია სახელმწიფო საზღვრის კონტროლს თანამედროვე სტანდარტების შესაბამისად ახორციელებს. აღნიშნული სტანდარტი გულისხმობს გამშვები პუნქტების გარდა ტერიტორიების ე.წ. მწვანე ზოლის სასაზღვრო პოლიციის მორიგე ჯგუფების მიერ კონტროლს. ალბათობა იმისა, რომ საზღვრის რომელიმე წერტილი ადამიანმა მესაზღვრის გვერდის ავლით გადაკვეთოს დაბალია, მაგრამ არსებობს.

აზერბაიჯანელი კოლეგების განცხადებით, აფგან მუხთარლის შემთხვევაში სწორედ მსგავს ფაქტთან გვაქვს საქმე. ამ ეტაპზე ეს არის საქმეში არსებული ერთადერთი ოფიციალურად და სამართლებრივად გამყარებული გარემოება  

მედიაში გავრცელდა ინფორმაცია, რომ თითქოს მუხთარლის ჰქონდა საზღვრის გავლის წინასწარ შემუშავებული სქემა, რომ ეს არ იყო პრეცენდენტი და იგი რეგულარულად ახორციელებდა არადეკლარირებული ვალუტის კონტრაბანდული გზით შეტანას აზერბაიჯანის რესპუბლიკაში. ჩვენ ამ ეტაპზე ვერც უარვყოფთ და ვერც დავადასტურებთ ზემოთ ხსენებულ გარემოებებს, გამოძიებით ჯერჯერობით დადგენილი არ არის ამ ვერსიის უტყუარობა და ავთენტურობა, ასევე ჰქონდა თუ არა რაიმე წინასწარი ინფორმაცია აზერბაიჯანულ მხარეს და ახორციელებდნენ თუ არა ამ კონკრეტულ მონაკვეთზე გაძლიერებულ კონტროლს, პარალელურად განსხვავებულ ვერსიას გვთავაზობს აფგან მუხთარლის მეუღლე, აზერბაიჯანელი ჟურნალისტი და აქტივისტი ლეილა მისტაფაევა და მუხთარლის ადვოკატი. ადვოკატი ამბობს, რომ მისი დაცვის ქვეშ მყოფი თბილისიდან ძალის გამოყენებით გაიტაცეს, მისი თქმით, თავდამსხმელებს სამოქალაქო სამოსი ეცვათ და ვარაუდობს, რომ შესაძლოა საქართველოს სპეცსამსახურები ყოფილიყვნენ. სამწუხაროდ, მუხთარლის ადვოკატის განცხადება სრულიად ცალმხრივად და დაუსაბუთებლად აიტაცეს გარკვეულმა პირებმა და ყოველგვარი ფაქტობრივი მტკიცებულებების, ყოველგვარი დასაბუთების გარეშე ხდება ამ ვერსიის ტირაჟირება. ჩვენ კარგად გვესმის ზოგიერთი ჩვენი მოქალაქისა და ორგანიზაციის ემოციური დამოკიდებულება ამ საკითხის მიმართ, თუმცა ამგვარი დამოკიდებულების მიუხედავად არასწორად დაუშვებლად მიგვაჩნია საქმეზე წინასაწაი დასკვნების გაკეთება, მით უმეტეს ქვეყნის უსაფრთხოებაზე პასუხისმგებელი უწყებების დისკრედიტაციის მცდელობა. ჩვენ ვართ დემოკრატიული ქვცეყანა, რომელიც მიისწრაფის ევროკავშირისა და ევროატლანტიკური სტრუქტურებისკენ, იზიარებს მათ ფასეულობებს, აღიარებს კანონის უზენაესობას და სრული პასუხისმგებლობით ვაცხადებ, რომ საქმის ამგვარ ვერსიასთან საქართველოს სამართალდამცავ უწყებებს შემხებლობა არ აქვთ და არც შეიძლება ჰქონდეთ. ჩვენს ქვეყანაში აზერბაიჯანელი ეროვნების ძალიან ბევრი ადამიანი ცხოვრობს და სახელმწიფო არასდროს დაინტერესებულა მათი დამოკიდებულებით აზერბაიჯანის ხელისუფლებისადმი“, - განაცხადა შს მინისტრმა