დღეს გამართულ მთავრობის სხდომაზე პრემიერ-მინისტრმა, გიორგი კვირიკაშვილმა განაცხადა, რომ სამოქალაქო უსაფრთხოების შესახებ კანონში ცვლილებების თანახმად, სიცოცხლის, ჯანმრთელობისა და ქონების დაზღვევა სავალდებულო გახდება.
„ძალიან მნიშვნელოვანი ცვლილება შედის სამოქალაქო უსაფრთხოების შესახებ კანონში. ბოლო პერიოდში რამდენიმე ხანძარმა საკმაო ზარალი მიაყენა სავაჭრო ცენტრებს, მომხმარებლებს, მცირე და საშუალო ბიზნესს, თვითონ ამ ცენტრების მფლობელებს.
ჩვენ შემოგვაქვს ცვლილება, სახელმწიფო შეადგენს ნუსხას, ამ ნუსხაში გათვალისწინებულ ობიექტებს და მათ მფლობელებს სავალდებულო დაზღვევა მოეთხოვებათ, რადგან მესამე პირების მხრივ, სიცოცხლის, ჯანმრთელობისა და ქონების ნაწილში მიყენებული ზიანი იქნეს აუცილებელი წესით დაზღვეული. ჩვენ, სამწუხაროდ, წარსულში უარი ვთქვით არაერთ სავალდებულო დაზღვევის სახეობაზე და ეს იყო ძალიან დიდი შეცდომა. ვეცადოთ, რომ განვავითაროთ ცივილიზებული ფორმები, ის ფორმები, რომელიც ყველა განვითარებულ ქვეყანაში არსებობს. მხედველობაში მაქვს მესამე პირის მიმართ ჯანმრთელობის, სოცოცხლისა და ქონების ზიანის ანაზღაურება - ამ მიმართულებით გაგრძელდება მუშაობა. იმისათვის, რომ ჩვენი მოქალაქეებისა და მცირე ბიზნესის ინტერესები იყოს დაცული. ძალიან მნიშვნელოვანია, რომ ასეთი სავაჭრო ცენტრებისა და მსხვილი საზოგადოებრივი თავშეყრის ადგილების მფლობელებსაც ექნებათ გაცილებით ნაკლები ტვირთი და გამოირიცხება ისეთი ფაქტები, რაც მოხდა ბოლო პერიოდში“, - განაცხადა კვირიკაშვილმა
