ტელეანძის მონაცემები მუშავდება, გამოთხოვილია ვიდეოჩანაწერები, დაკითხულია ათეულობით მოწმე - ამის შესახებ საპარლამენტო უმრავლესობის ლიდერმა, არჩილ თალაკვაძემ აფგან მუხთარლის საქმის გამოძიებასთან დაკავშირებით განაცხადა.
თალაკვაძე ფიქრობს, რომ აფგან მუხთარლის საქმეზე გამოძიება ნორმალური ტემპით და გამჭვირვალედ მიმდინარეობს და შინაგან საქმეთა სამინისტრო გამოძიების დეტალებზე საზოგადოებას სრულ ინფორმაციას აწვდის.
„ინფორმაცია, რომელიც ჩვენ გვაქვს არის ის, რომ საგამოძიებო მოქმედებები მიმდინარეობს ინტენსიურ რეჟიმში, მიმდინარეობს ტელეანძის მონაცემების დამუშავება, გამოთხოვილია ვიდეოჩანაწერები, დაკითხულია ათეულობით მოწმე, იგეგმება თავად ბატონი მუხთარლის დაკითხვა აზერბაიჯანის სასჯელაღსრულების სისტემის მიერ. ვფიქრობ, გამოძიება მიდის ნორმალური ტემპით და გამჭვირვალედ, საზოგადოება ამის შესახებ ინფორმირებულია", - განახადა არჩილ თალაკვაძემ.
რაც შეეხება ჟურნალისტის გატაცების ფაქტს, არჩილ თალაკვაძე ამბობს, რომ მტკიცედ სჯერა,საქართველოს ხელისუფლება არც ერთი ფორმით მუხთარლის საქმეში არაა ჩართული.
