დღეს მთავრობის სხდომის დასრულების შემდეგ სოფლის მეურნეობის მინისტრმა, ლევან დავითაშვილმა საქართველოს ცხვრის იმპორტთან დაკავშირებულ ცვლილებებზე ისაუბრა. მისი თქმით, ცვლილებები ქართველ მეცხვარეთა და ფერმერთა ინტერესების დაცვას ემსახურება.
მინისტრმა აღნიშნა, რომ მთავარი ცვლილება ცხვრის ექსპორტთან დაკავშირებით კარანტინის წესების გამკაცრებაა.
„ცვლილებები უკავშირდება კარანტინის წესების გამკაცრებას. თქვენ იცით, რომ სამწუხარო პრაქტიკა არსებობდა, საქართველოში მეზობელი ქვეყნებიდან ცხვრის შემოყვანის. იყო ისეთი შემთხვევებიც, როცა მათ ქართულ ცხვარში ურევდნენ. რა თქმა უნდა, ეს ვეტერინარული თვალსაზრისით, რისკისშემცველია, ქართულ ცხვარში უცხო ცხვრის შერევა. კარანტინის წესები ახლა საკმაოდ მკაცრად გაკონტროლდება. შესაბამისად, ფაქტობრივად გამოირიცხება შემთხვევები, როცა საქართველოდან ქართულის სახელით გავა ექსპორტზე უცხო ქვეყნიდან შემოყვანილი ცხვარი.“ - განაცხადა დავითაშვილმა.
შეგახსენებთ, რომ 27 მაისს სტუდია „მონიტორმა“ მოამზადა საგამოძიებო ფილმი ცხვრის ექსპორტთან დაკავშირებით.
