ჰიპ-ჰოპ პროექტის „ბირჟა მაფიას“ ბოლო კლიპს უკავშირებს მიშკა მგალობლიშვილისა და Kay G (გიორგი ქებურია) დაკავებას ოჯახის ახლობელი. 

მისი ინფორმაციით, დაკავების წინა დღეს გიორგი ქებურიას შსს-დან დაურეკეს და კლიპის აღება მოსთხოვეს, რაზეც უარი თქვეს და მხოლოდ პოლიციელი დაფარეს. 

„როგორც ვიცი, წინა დღით დაურეკეს და სთხოვეს კლიპის წაშლა, ამათ არ წაუშლიათ, მაგრამ დაბლარეს პოლიციელი და აღარ ჩანდა და მეორე დღეს მოხდა ეს ამბავი. ვინ დაურეკა, ზუსტად არ ვიცი. ჩემი ინფორმაციით, შშს-დან პირადად მიშკას ესაუბრნენ“ - განუცხადა ოჯახის ახლობელმა „ლიბერალს“ 

ოფიციალური ინფორმაციით, შსს-მ „ბირჟა მაფიის“ წევრები, მიშკა მგალობლიშვილი და გიორგი ქებურია ნარკოდანაშაულის ბრალდებით დააკავა. უწყების ინფორმაციით, სამართალდამცველებმა მ.მ.-ს პირადი ჩხრეკისას 1,4965 გრამი ნარკოტიკული საშუალება „მდმა“, ხოლო გ.ქ.-ს პირადი ჩხრეკისას 2,3342 გრამი „მდმა“ ამოიღეს.

„შსს-ს თბილისის პოლიციის დეპარტამენტის დეტექტივების სამმართველოს მე-2 და მე-3 განყოფილებების თანამშრომლებმა ოპერატიულ-სამძებრო და საგამოძიებო ღონისძიების შედეგად, ორი პირი - 1989 წელს დაბადებული მ.მ. და 1996 წელს დაბადებული გ.ქ. ნარკოდანაშაულისათვის თბილისში დააკავეს“.
შსს-ს ცნობით, გ.ქ. დანაშაულს აღიარებს.
გამოძიება განსაკუთრებით დიდი ოდენობით ნარკოტიკული საშუალების უკანონო შეძენა-შენახვის ფაქტზე მიმდინარეობს (საქართველოს სსკ-ს 260-ე მუხლის მე-6 ნაწილის „ა“ ქვეპუნქტით).