FlowFlow Magazine-ის ორგანიზებით, ვაკის პარკში „ბირჟა მაფიის" მხარდასაჭერად აქცია-კონცერტი იმართება. 

„ძირს ის პოლიციური სისტემა, რომელიც გვებრძვის და გვაშანტაჟებს. რაც მოხდება არის ის, რომ დასრულდება მათი თარეში. პოლიციური ტერორი - ძირს, პოლიციური ტერორი - ძირს!" - თქვა „თეთრი ხმაურის მოძრაობის" წარმომადგენელმა ბექა წიქარიშვილმა სცენაზე. 

„გამოდის, რომ მე არ შემიძლია სიმღერა დავწერო რაღაცაზე, რაც მე მაწუხებს. საბჭოთა კავშირში, ან ჩრდილო კორეაში ხომ არ ვცხოვრობთ? ვართ ევროპულ ქვეყანაში, საქართველოში. ევროპაში, არტისტები იმაზე წერენ, რაზეც უნდათ" - პროექტ FlowFlow Magazine-ის წარმომადგენლები „ლიბერალთან" „ბირჟა მაფიის" წევრების დაკავების შესახებ საუბარობენ.

შსს-მ „ბირჟა მაფიის“ წევრები, მიშკა მგალობლიშვილი და გიორგი ქებურია ნარკოდანაშაულის ბრალდებით დააკავა. უწყების ინფორმაციით, სამართალდამცველებმა მ.მ.-ს პირადი ჩხრეკისას 1,4965 გრამი ნარკოტიკული საშუალება „მდმა“, ხოლო გ.ქ.-ს პირადი ჩხრეკისას 2,3342 გრამი „მდმა“ ამოიღეს. 

თავად ჯგუფის წევრები ამბობენ, რომ მათ დაპატიმრება ვიდეოკლიპს უკავშირდება, რომელშიც პოლიციელია გაშარჟებული.

დაკავებული რეპერი: მირტყამდნენ თავში, მაიძულებდნენ აღიარებას, რომ ნარკოტიკი ჩემი იყო

ორივე მათგანს დღეს სასამართლომ წინასწარი პატიმრობა შეუფარდა. 

ხვალ, 10 ივნისს, 19:00 საათზე „ბირჟა მაფიას" რეპერების მხარდასაჭერად მოქალაქეები რუსთაველის მეტროს მიმდებარე ტერიტორიიდან პარლამენტის შენობამდე საპროტესტო მსვლელობა-აქციას მოაწყობენ.