მელიქიშვილის 10 ნომერში მოქალაქეები ისტორიისა და ეთნოლოგიის ინსტიტუტის შენობის დასაცავად შეიკრიბნენ. 

„დაეტიეთ თქვენს კვადრატში", „ქალაქი ჩემია" - სწორედ ამ გზავნილებით შეიკრიბნენ მოქალაქეები აქციაზე, რომელსაც „ტფილისის ჰამქარი" და „პარტიზანი მებაღეები" უერთდებიან. 

თბილისში, მელიქიშვილის #10 ნომერში ისტორიისა და ეთნოლოგიის ინსტიტუტის ადგილას კომპანია m2 მრავალფუნქციური შენობის მშენებლობას გეგმავს. სამშენებლო სამუშაოები უკვე დაწყებულია, რასაც სპეციალისტები, არასამთავრობო სექტორი და აქტივისტები აპროტესტებენ. 

„ეს არის შენობა, რომელსაც მიუხედავად იმისა, რომ ყველა კრიტერიუმით უნდა ჰქონდეს ძეგლის სტატუსი, სამწუხაროდ ამ ხნის განმავლობაში არცერთმა ხელისუფლებამ ეს სტატუსი არ მიანიჭა. მიუხედავად იმისა, რომ ჩვენ რამდენჯერმე მივმართეთ სამინისტროს ამ მოთხოვნით, სტატუსი მაინც არ მიანიჭეს. ამასობაში ძეგლი გაიყიდა, დღეს მისი მფლობელი არის მ2 და მის მიერ წარმოადგენილი პროექტის მიხედვით ეს შენობა უნდა დაინგრეს, ეს იქნება კიდევ ერთი მაგალითი იმ ტენდენციისა რომელიც საქართველოში არსებობს ვანგრევთ ძველს, ისტორიულს, ვაშენებთ ახალს და გვინდა რომ ამ ახალს დაერქვას ისევ ძვალის სახელი. მოთხოვნა არის შემდეგი, სტატუსი მიენიჭოს შენობას, შეჩერდეს დემონტაჟი, რომლის ნებართვაც არ არის გაცემული“,- ამბობს  „ტიფლისის ჰამქრის“ წარმომადგენლი, ურბანისტი ცირა ელისაშვილი.

„ქართული სტილის" ერთ-ერთი ყველაზე მნიშვნელოვანი ნიმუში, ისტორიისა და ეთნოგრაფიის ინსტიტუტის (ყოფილი ტუბერკულიოზის დისპანსერი) შენობა საფრთხეშია! ნაგებობა კომპანია m2-ს საკუთრებაა, რომელსაც მის ნაცვლად სასტუმროს აშენება აქვს განზრახული. უნებართვო დემონტაჟი დაწყებულია! ჩვენ სპეციალური დოკუმენტაციის წარდგენით ორჯერ მივმართეთ შესაბამის უწყებებს არქიტექტორ კ. ლეონტიევის მიერ1929-30-ან წლებში, აშენებული ობიექტისათვის ძეგლის სტატუსის მინიჭების მოთხოვნით. თუმცა პასუხი არ მიგვიღია.
მივმართავთ ყველას, ვისაც ადარდებს თბილისის ბედი! ვინც ფიქრობს, რომ ქალაქი ჩვენია! ვინც იცის, რომ ინვესტიცია არ უნდა კლავდეს, ისტორიულ მემკვიდრეობას! განსაკუთრებით მივმართავთ მათ, ვინც წლების მანძილზე დადის ჰამქრის ტურებზე, რათა აღმოაჩინოს უცნობი თბილისი.. დღეს ქალაქს მელიქიშვილის 10-ში უჭირს" - ნათქვამია „ტფილისის ჰამქრის" განცხადებაში. 

უფრო ვრცლად ამ საკითხზე იხილეთ ქრისტინე მუჯირის სტატია: m2-ის სასტუმროს პროექტი ისტორიის ინსტიტუტის ადგილას და სამოქალაქო პროტესტი