საქართველოს ეკონომიკისა და მდგრადი განვითარების სამინისტროს ინფორმაციით, დღეს გიორგი გახარია აზერბაიჯანის რესპუბლიკის პრეზიდენტს, ილჰამ ალიევს შეხვდა.
სამინისტროს ინფორმაციით, ილჰამ ალიევმა და გიორგი გახარიამ ორ ქვეყანას შორის არსებულ სავაჭრო-ეკონომიკურ ურთიერთობებსა და სატრანზიტო პოტენციალის განვითარების საკითხებზე ისაუბრეს.
„ჩვენს სავაჭრო ბალანსში დიდი ადგილი უჭირავს ენერგომატარებლებს და ტრანსპორტს, თუმცა უნდა გავააქტიუროთ სხვა მიმართულებებიც, მათ შორის ორმხრივი სავაჭრო პოტენციალი. ბოლო ოთხი თვის განმავლობაში ჩვენი სავაჭრო ბრუნვა გაიზარდა და ყველაფერი უნდა გავაკეთოთ იმისათვის, რომ ეს ტენდენცია გაგრძელდეს. აზერბაიჯანის პრეზიდენტთან ასევე ვისაუბრეთ თანამშრომლობაზე ტურიზმის სფეროში. მიგვაჩნია, რომ მნიშვნელოვანია ორი ქვეყნის პოტენციალის ერთობლივად გამოყენება, რათა ტურისტების რაოდენობა გაიზარდოს და მათი მოზიდვა გამარტივდეს“ – აღნიშნა შეხვედრის დასრულების შემდეგ გიორგი გახარიამ.
მინისტრის თქმით, ილჰამ ალიევთან შეხვედრაზე საუბარი ასევე შეეხო აბრეშუმის გზის ფორუმს და იმ სატრანზიტო დერეფნებს, რომელთა განვითარებასაც განსაკუთრებული მნიშვნელობა აქვს ორივე ქვეყნისთვის. გიორგი გახარიას განცხადებით, საუბარია როგორც აღმოსავლეთ-დასავლეთის, ასევე სამხრეთ-ჩრდილოეთის სატრანსპორტო დერეფნების განვითარებაზე.
აზერბაიჯანის რესპუბლიკაში ორდღიანი ვიზიტის ფარგლებში ასევე დაგეგმილია გიორგი გახარიას შეხვედრები ქვეყნის პრემიერ-მინისტრთან, ასევე ეკონომიკისა და ტრანსპორტის მინისტრებთან.
