ევროპარლამენტმა აფგან მუხთარლის საქმეზე მომზადებული რეზოლუცია მიიღო. მასში ასევე საუბარია აზერბაიჯანში მედიის მდგომარეობის შესახებ. 

რეზოლუციაში დაგმობილია აზრებაიჯანელი ჟურნალისტის თბილისიდან გაუჩინარების ფაქტი და შემდგომ ბაქოში მისი დაკავება. ევროკავშირი მოუწოდებს საქართველოს, უზრუნველყოს სწრაფი, გამჭვირვალე გამოძიება, თუ როგორ გაუჩინარდა საქართველოდან აფგან მუხთარლი და როგორ მოხვდა ბაქოში. 

რეზოლუციის ტექსტის მიხედვით, საქართველო, როგორც ადამიანის უფლებების ევროპული კონვენციის წევრი ქვეყანა, ვალდებულია, ქვეყანაში მცხოვრები აზერბაიჯანის მოქალაქეებისთვის  შექმნას უსაფრთხო ცხოვრების გარანტია. 

რეზოლუციაში ასევე აღნიშნულია, რომ მუხთარლის საქმე კიდევ ერთხელ უსვამს ხაზს, რომ აზერბაიჯანში იდევნება კრიტიკული აზრი.

ევროპარლამენტი რეზოლუციით მოუწოდებს აზერბაიჯანს, უარი თქვას ყველა ბრალდებაზე და გაათავისუფლოს ჟურნალისტი, რათა ის დაუბრუნდეს ოჯახს საქართველოში. 

აზერბაიჯანელი ჟურნალისტი აფგან მუხთარლი, რომელიც თბილისში 2015 წლიდან ცხოვრობს, ამბობს, რომ 24 მაისს თბილისიდან გაიტაცეს, მეორე დღეს კი აზერბაიჯანში დააკავეს. 

აფგანის თქმით, მას საღამოს საათებში თბილისში ჭონქაძის ქუჩაზე დახვდა სამი პირი, მათგან ორი სამართალდამცავის ფორმაში იყო ჩაცმული. გამტაცებლებმა თავზე ტომარა ჩამოაცვეს, ასევე მიაყენეს ფიზიკური შერაცხყოფა. 

აზერბაიჯანის სასამართლომ მუხთარლის სამთვიანი წინასწარი პატიმრობა შეუფარდა. 

აზერბაიჯანის პროკურატურამ ჟურნალისტ აფგან მუხთარლის სამართალდამცავებისათვის წინააღმდეგობის გაწევის, საზღვრის უკანონო გადაკვეთისა და კონტრაბანდის ბრალდებით წაუყენა ბრალი.

საქართველოს შსს მუხთარლის საქმეს თავისუფლების უკანონო აღკვეთის მუხლით იძიებს.