ევროპის საბჭოს საპარლამენტო ასამბლეაში საქართველოს პარლამენტის მუდმივმოქმედი დელეგაციის ხელმძღვანელის, პირველი ვიცე-სპიკერ თამარ ჩუგოშვილის განაცხადებით: ევროპის საბჭოს საპარლამენტო ასამბლეის იურიდულ საკითხთა და ადამიანის უფლებების კომიტეტმა საქართველოს ოკუპირებულ ტერიტორიებზე ადამიანის უფლებების მონიტორინგის განხორციელებაზე რეზოლუციის შექმნას ერთსულოვნად დაუჭირა მხარი.
ჩუგოშვილის თქმით, რეზოლუციაზე მუშაობა მომდევნო სესიიდან დაიწყება, შესაბამისად, შეირჩევა მომხსენებელი, ვინც ანგარიშსა და რეზოლუციის პროექტს მოამზადებს.
„რეზოლუციაში ოკუპირებული რეგიონების მონიტორინგზე პოლიტიკური გადაწყვეტილება უნდა დაფიქსირდეს და მის საფუძველზე ადამიანის უფლებათა კომისარს აღნიშნულ ტერიტორიებზე შესვლის, მონიტორინგის ნება უნდა მიეცეს", - აცხადებს ჩუგოშვილი.
საქართველოს პარლამენტის თავმჯდომარის პირველი მოადგილის თქმით, საქართველოს ოკუპირებულ ტერიტორიებთან მიმართებით ევროსაბჭოს მიერ პოზიციის რეზოლუციით დაფიქსირება მნიშვნელოვანია.
რეზოლუციის მიღების შემთხვევაში, შესაძლებელი გახდება ოკუპირებულ ტერიტორიებზე ადამიანის უფლებების დარღვევის ფაქტების შესწავლა.
რეზოლუციის მომზადებას მმართველ გუნდთან ერთად ოპოზიციაც უჭერს მხარს.
საქართველოს პარლამენტის ვებგვერდის თანახმად, უკანასკნელად ევროპის საბჭოს საპარლამენტო ასამბლეამ საქართველოს ოკუპირებულ ტერიტორიებთან დაკავშირებით რეზოლუცია 2013 წელს მიიღო.
