„ციანიდის საქმეზე“ დაცვის მხარის პირველი მოწმე, ირაკლი ფირცხალავა, საქალაქო სასამართლოში დაიკითხა. დეკანოზ გიორგი მამალაძის ადვოკატი, გიორგი ფანცულაია, ამბობს, რომ ირაკლი ფირცხალავამ დაასახელა კონკრეტული საქმეები, სადაც ირაკლი მამალაძე აგენტი იყო.
„დაასახელა, მაგალითად, თემურ თათარაშვილის საქმე, რომელშიც ის იყო აგენტ-პროვოკატორი, მისი მეშვეობით დააკავეს. ასევე გაიხსენა ჟურნალისტ გიო გაბუნიას საქმე, რომლის დაკავება ე.წ. აგენტ-პროვოკატორ ირაკლი მამალაძის მონაწილეობით მოხდა. მან თანხაც კი დაასახელა, ამის სანაცვლოდ რა თანხა მიღო ირაკლი მამალაძემ და ძალოვან სტრუქტურებში დასაქმებული პირებიც, რომლებიც მონაწილეობდნენ სპეცოპერაციებში, დაკავებაში. ამ საქმეში კონკრეტულად ის ადამიანებიც მიუთითა, რომლებმაც უშუალოდ გადასცეს ირაკლი მამალაძეს თანხა“, - განაცხადა ადვოკატმა, გიორგი ფანცულაიამ
თბილისის კრიმინალური პოლიციის ყოფილი მაღალჩინოსნის მტკიცებით, „ციანიდის საქმეში“ პროკურატურის მთავარი მოწმე ირაკლი მამალაძე უშიშროების სამსახურის აგენტია.
პროკურატურა საპასუხოდ აცხადებს, რომ მათ გამოითხოვეს პასუხი უშიშროების სამსახურიდან, რომლის თანახმადაც, ირაკლი მამალაძე არ არის მათი აგენტი.
