თავდაცვის მინისტრის, ლევან იზორიას ინფორმაციით, მათ ჰქონდათ შესაძლებლობა, მონიტორინგი ჩაეტარებინათ და დაკვირვებოდნენ ხანძარს. როგორც მან შტაბის დატოვების შემდეგ ჟურნალისტებს განუცხადა, დღეს მდგომარეობა გამოსწორებულია.
"კერები არსებობს, მაგრამ ხდება მათი იდენტიფიცირება, წერტილოვნად წყლის დასხმა ამ კერებზე, დიდი ინტენსივობით, კლიმატური პირობები სამწუხაროდ ხელს არ გვიწყობს. ქარია, რაც უწყობს ხელს, რომ გაღვივდეს ცეცხლი",-თქვა იზორიამ.
მინისტრის თქმით, ყველა უწყება მაქსიმალურად არის ჩართული და ყველაფერი კეთდება მიმდებარე სოფლების მოსახლეობის დაცვისთვის.
"ატენის ხეობაში შესაძლებელი გახდა ჩვენი უწყების ჩართვით ხანძრის ჩაქრობა, მზად ვართ ჩვენი ძალებით აქ მაქსიმალურად ვიყოთ წარმოდგენილნი, მაგრამ ხაზგასმით უნდა აღვნიშნო, აქ რელიეფი არის რთული და ცოცხალ ძალაზე არ არის დამოკიდებული მისი ჩაქრობა, რაც იყო ატენის შემთხვევაში".
თავდაცვის მინისტრმა ჟურნალისტებთან აღნიშნა, რომ ყველა ეჭვს იმის შესახებ, განგებ გააჩინეს თუ არა ხანძარი ტყეში, გამოძიება გასცემს პასუხს.
