„ზემო ოსიაური - ჩუმათელეთის მონაკვეთზე მშენებლობა იწყება, რომელიც ჯამში 15 კილომეტრამდეა“, -ამის შესახებ საქართველოს პრემიერმა მთავრობის სხდომაზე განაცხადა. პრემიერის თქმით, ამის შემდეგ დაიწყება ყველაზე რთული, რიკოთის მონაკვეთის მშენებლობა, რომლის დიზაინზეც მუშაობა ჯერ არ დასრულებულა და ამ მონაკვეთის ღირებულება მილიარდ დოლარამდე იქნება.
„რაც შეეხება რიკოთის მონაკვეთს, მიმდინარეობს დიზაინის საბოლოო დაზუსტება, დაახლოებით მილიარდ დოლარამდე იქნება ამ მონაკვეთის ღირებულება. ეს არის უმნიშვნელოვანესი და ალბათ ყველაზე რთული მონაკვეთი და ეს იქნება 55 კილომეტრამდე, 90 ხიდის და 40 მაგისტრალური გვირაბის შემცველი მონაკვეთი. აქაც ასობით ადამიანი დასაქმდება, რაც ძალიან მნიშვნელოვანია. თუ არ ვცდები მომავალი წლისთვის მზად ვიქნებით ამ მონაკვეთის მშენებლობის დაწყებისთვის. მე ძალიან მიხარია, რომ კარგი ტემპით მივდივართ, არ გვაქვს ჩამორჩენა სივრცითი განვითარების გეგმის დროით ინდიკატორებთან. მინდა მოსახლეობას სივრცითი განვითარების აღსრულების შესახებ რეგულარულად ვაცნობოთ“, - განაცხადა გიორგი კვირიკაშვილმა.
