„საგანგაშოა ხელისუფლების უხეში ჩარევა დამოუკიდებელი პროფკავშირული გაერთიანების არჩვენებში, იმგვარი კანდიდატურის წამოყენებით, რომელსაც არ ესმის პროფკავშირული ბრძოლა და არ აქვს შესაბამისი კომპეტენცია შრომით და სოციალურ საკითხებში. მას არ გააჩნია ლეგიტიმაცია მშრომელების მოძრაობაში", - განაცხადა დღეს გამართულ პრესკონფერენციაზე „სოლიდარობის ქსელის" წარმომადგენელმა შოთა აზიკურმა.
„ამიტომაც, ამ კანდიდატის წარდგენით გაერთიანებული პროფკავშირების წინასაარჩევნო გარემო გადაიქცა პირადი დაპირისპირებებისა და პიროვნული შუღლის სივრცედ. რამაც უკანა პლანზე გადასწია მშრომელი მოსახლეობის სასიცოცხლოდ მნიშვნელოვანი საკითხები. ამ სიტუაციამ კიდევ უფრო ცხადად გვაჩვენა, რომ გაერთიანებული პროფკავშირის საქმიანობა მოითხოვს განახლებას, დემოკრატიულობასა და ახალ ლიდერებს. მიუხედავად იმისა, რომ საქართველოს გაერთიანებულ პროფკავშირებში არსებობს ძლიერი, აქტიური დარგები, რომლებიც ყოველთვის მშრომელთა მოძრაობის წინა ხაზზე არიან, თუ გაერთიანების ხელმძღვანელობა არ განახლდება, შესაძლოა, ამ დარგებმაც ვეღარ შეძლონ საკუთარი პოტენციის გამოყენება.
თანამედროვე სამყაროში, მშრომელთა გაერთიანებები ახალი გამოწვევების წინაშე დგანან, რაც განსხვავებული სტრატეგიებისა და ფორმების საჭიროებას აჩენს, სწორედ, ამიტომ ვაშენებთ ახალ პროფკავშირულ ორგანიზაციას, რომელიც ორიენტირებულია არსებულ გამოწვევებთან გამკლავებაზე და სოციალური სამართლიანობის მიღწევის ახალი გზების გამოძებნაზე, ეფექტური, დემოკრატიული და გამჭვირვალე მეთოდების გამოყენებით", - განაცხადა შოთა აზიკურმა.
